വീട്ടുമുറ്റത്ത് പാര്‍ക്ക് ചെയ്ത കാറിനകത്ത് കുടുങ്ങി നാലുകുട്ടികള്‍ ശ്വാസം മുട്ടി മരിച്ചു. ഉത്തര്‍പ്രദേശ് ഭഗ്പതിലെ ചാന്ദിനഗറിലാണ് സംഭവം. രാജ്കുമാര്‍ എന്നയാള്‍ പാര്‍ക്ക് ചെയ്തിരുന്ന കാറിൽ അയൽവാസികളായ അഞ്ച് കുട്ടികൾ കയറി കളിക്കുകയായിരുന്നു. ഇതിനിടെ കാർ ഓട്ടോലോക്കായി. അഞ്ചുപേരും അകത്ത് കുടുങ്ങി. അവശനിലയിലായ കുട്ടി കാറിന്റെ ഗ്ലാസിൽ ഇടിക്കുന്നത് കണ്ട പരിസരവാസികൾ വന്നുനോക്കിയപ്പോഴാണ് നാലുപേർ അവശനിലയിൽ കിടക്കുന്നത് കണ്ടത്. ഉടൻ വാഹനം തുറന്നു കുട്ടികളെ പുറത്തെടുത്തുവെങ്കിലും നാലുപേർ അപ്പോഴേക്കും മരിച്ചിരുന്നു. ഒരാളുടെ നില അതീവ ഗുരുതരമാണ്. സംഭവത്തിൽ അന്വേഷണം ആരംഭിച്ചതായി ഖേഗ്ര ഇൻസ്‌പെക്ടർ എം എസ് റാവത്ത് പറഞ്ഞു. ശ്വാസംമുട്ടിയാണ് ഇവരുടെ മരണം. മരിച്ചവരില്‍ രണ്ടു പെണ്‍കുട്ടികളും രണ്ട് ആണ്‍കുട്ടികളും ഉള്‍പ്പെടും.