രാജ്യത്ത് കൊവിഡിന്റെ രണ്ടാം തരംഗം ശക്തി പ്രാപിച്ചുക്കൊണ്ടിരിക്കുന്ന ചെയ്യുന്ന സാഹചര്യത്തില്‍, കേന്ദ്രസര്‍ക്കാരിനെതിരെ ആഞ്ഞടിച്ച്‌ നടന്‍ പ്രകാശ് രാജ്. 3000 കോടി രൂപ മുടക്കി നിര്‍മിച്ച സര്‍ദാര്‍ വല്ലാഭായ് പട്ടേല്‍ പ്രതിമയുമായി ബന്ധപ്പെട്ട് പ്രധാനമന്ത്രി നരേന്ദ്ര മോഡിയെ രൂക്ഷമായി വിമര്‍ശിക്കുന്ന പഴയ വിഡിയോ പങ്കുവെച്ചുകൊണ്ടാണ് അദ്ദേഹം ട്വിറ്ററില്‍ പ്രതികരിച്ചത്. ഞാന്‍ നിങ്ങള്‍ക്ക് മുന്നറിയിപ്പ് നല്‍കിയിരുന്നു. കഴിവില്ലാത്ത, വീക്ഷണമില്ലാത്ത, അധികാരഭ്രമമുള്ള സര്‍ക്കാറിനെ കുറിച്ച്‌ മുന്നറിയിപ്പ് നല്‍കുന്നത് ഇനിയും തുടരുക തന്നെ ചെയ്യും. ഉണരൂ ഇന്ത്യ… – എന്ന അടിക്കുറിപ്പോടെയാണ്‌ പ്രകാശ് രാജ് വിഡിയോ പങ്കുവെച്ചത്.
‘നമ്മുടെ രാജ്യത്തിന്റെ തലവനെ കുറിച്ച്‌ നിങ്ങള്‍ എന്താണ് കരുതുന്നത്. കേരളത്തില്‍ പ്രളയമുണ്ടായപ്പോള്‍ അദ്ദേഹം ആദ്യം 100 കോടിയും പിന്നീട് 500 കോടിയും നല്‍കുന്നു. അതേ വ്യക്തി തന്നെ ഒരു പ്രതിമ പണിയാന്‍ 3000 കോടി ചിലവഴിക്കുന്നു. എത്രത്തോളം വിവേകമില്ലാത്ത നേതാവാണ് നമുക്കുള്ളത്. നിങ്ങളാണ് ആ ചോദ്യം ചോദിക്കേണ്ടത്. എല്ലാവര്‍ക്കും അറിയാവുന്ന കാര്യമാണ്… പൊങ്ങച്ചക്കാരന്‍. അഹംഭാവമുള്ള ബുദ്ധിശൂന്യന്‍. അയാള്‍ ഈ രാജ്യത്തോട് ഇങ്ങനെ ചെയ്യരുത്.
തൊഴിലില്ലായ്മയും കാര്‍ഷിക പ്രതിസന്ധികളും നിലനില്‍ക്കുന്ന ഈ രാജ്യത്തോട് ഒരിക്കലും ചെയ്യാന്‍ പാടില്ലാത്തതാണിത്. മറ്റൊന്ന്, അത് നമ്മുടെ പണമാണ്… ഞങ്ങള്‍ ഭിക്ഷ യാചിക്കുന്നതല്ല. ചോദ്യം ചോദിക്കുക തന്നെ വേണം. നികുതി നല്‍കുന്നവരുടെ പണം ഉപയോഗിച്ച്‌ ചെയ്ത ഈ കാര്യത്തിന് അയാളെക്കൊണ്ട് മറുപടി പറയിപ്പിക്കുക തന്നെ ചെയ്യണം. ദയവ് ചെയ്ത മാധ്യമങ്ങള്‍ ഇത് പ്രചരിപ്പിക്കണം. 3000 കോടി രൂപയാണ്… 20000 കോടി ലഭിച്ചാല്‍ മാത്രം സ്വന്തം കാലില്‍ നില്‍ക്കാന്‍ സാധിക്കുന്ന ഒരു സംസ്ഥാനത്തിന് അയാള്‍, 500 കോടി മാത്രമാണ് നല്‍കിയത്’. – പ്രകാശ് രാജ് വിഡിയോയില്‍ പറയുന്നു.