വാഹനാപകടത്തിൽ പരിക്കേറ്റ് ചികിത്സയിലായിരുന്ന സത്യദീപം മുൻ ചീഫ് എഡിറ്റർ ഫാ. ചെറിയാൻ നേരേവീട്ടിൽ (49) മരിച്ചു. അപകടത്തിൽ തലക്ക് ഗുരുതര പരിക്കേറ്റ് കൊച്ചിയിലെ സ്വകാര്യാശുപത്രിയിൽ ചികിത്സയിലായിരുന്നു. ബുധനാഴ്ച ഹൃദയാഘാതമുണ്ടായതോടെ ആരോഗ്യനില മോശമായിരുന്നു. ഉച്ചയ്ക്ക് രണ്ടോടെയാണ് മരണം സംഭവിച്ചത്. സംസ്കാരം പിന്നീട്.
എറണാകുളം-അങ്കമാലി അതിരൂപതയിലെ മരട് സെൻറ് ജാന്നാ പള്ളി വികാരിയായിരുന്നു. മരട് പിഎസ് മിഷൻ ആശുപത്രിക്ക് സമീപം കഴിഞ്ഞ 13 ന് വൈകുന്നേരം നടക്കുന്നതിനിടെ ആശുപത്രി ജീവനക്കാരൻ ഓടിച്ച ബൈക്ക് തട്ടിയാണ് ചെറിയാന് ഗുരുതര പരിക്കേറ്റത്. അന്നു തന്നെ അടിയന്തിര ശസ്ത്രക്രിയയ്ക്കു വിധേയനാക്കിയിരുന്നു. തുടർന്ന് ആരോഗ്യനിലയിൽ പുരോഗതിയുണ്ടായപ്പോൾ വെൻറിലേറ്ററിൽ നിന്നു മാറ്റിയിരുന്നു.
നേരത്തെ വൃക്കദാനം നടത്തിയിട്ടുള്ള വൈദികനാണ് ഫാ. നേരേവീട്ടിൽ. 1971 ജൂൺ എട്ടിനു ഇടപ്പള്ളി തോപ്പിൽ ഇടവകയിലാണു ജനനം. 1997 ജനുവരി ഒന്നിന് ബിഷപ് മാർ ജേക്കബ് മനത്തോടത്തിൽ നിന്നു പൗരോഹിത്യം സ്വീകരിച്ചു. ജീസസ് യൂത്ത് ഇന്റർനാഷണൽ കൗൺസിലിന്റെ ചാപ്ലയിനായും സേവനം ചെയ്തിട്ടുണ്ട്.