2028-29 കാലയളവില്‍ യുഎന്‍ രക്ഷാസമിതിയിലെ സ്ഥിരമല്ലാത്ത അംഗത്വത്തിനുള്ള സ്ഥാനാര്‍ത്ഥിത്വം ഇന്ത്യ പ്രഖ്യാപിച്ചതായി വിദേശകാര്യ മന്ത്രി എസ് ജയശങ്കര്‍ വ്യാഴാഴ്ച പറഞ്ഞു. 2021 ആഗസ്റ്റിനുശേഷം, തിരഞ്ഞെടുക്കപ്പെട്ട യുഎന്‍എസ്സി അംഗമെന്ന നിലയില്‍ രണ്ട് വര്‍ഷത്തെ ഭരണകാലത്ത് ഇന്ത്യ കൗണ്‍സിലിന്റെ അധ്യക്ഷനാകുന്നത് രണ്ടാം തവണയാണ്.
‘2028-29, ലെ കൗണ്‍സിലില്‍ അടുത്ത കാലയളവിലേക്കുള്ള ഇന്ത്യയുടെ സ്ഥാനാര്‍ത്ഥിത്വം ഞങ്ങള്‍ പ്രഖ്യാപിച്ചിട്ടുണ്ട്. തിരികെ വരാന്‍ ഇന്ത്യ ആഗ്രഹിക്കുന്നു. ഇത് നിങ്ങളെ അറിയിക്കുന്നതില്‍ എനിക്ക് സന്തോഷമുണ്ട്.’- യുഎന്‍ സെക്യൂരിറ്റി കൗണ്‍സില്‍ സ്റ്റേക്ക്ഔട്ടില്‍ തീവ്രവാദ വിരുദ്ധ സിഗ്‌നേച്ചര്‍ ഇവന്റില്‍ അധ്യക്ഷനായ ശേഷം മാധ്യമപ്രവര്‍ത്തകരെ അഭിസംബോധന ചെയ്തുകൊണ്ട് ജയശങ്കര്‍ പറഞ്ഞു. ഡിസംബറിലാണ് ഇന്ത്യയുടെ നിലവിലെ സെക്യൂരിറ്റി കൗണ്‍സില്‍ അംഗത്വം അവസാനിക്കുന്നത്. എട്ടാം തവണയാണ് ഇന്ത്യ ഈ സ്ഥാനത്തേക്ക് എത്തുന്നതെന്നും കേന്ദ്രമന്ത്രി പറഞ്ഞു.
സുരക്ഷാ കൗണ്‍സിലില്‍ അടിയന്തര പരിഷ്‌കരണം ആവശ്യപ്പെടുന്ന ശ്രമങ്ങളില്‍ ഇന്ത്യ മുന്‍പന്തിയിലാണ്. കൗണ്‍സില്‍ അതിന്റെ നിലവിലെ രൂപത്തില്‍ ഇന്നത്തെ ഭൗമ-രാഷ്ട്രീയ യാഥാര്‍ത്ഥ്യങ്ങളെ പ്രതിഫലിപ്പിക്കുന്നില്ലെന്നും ഇന്ത്യയെപ്പോലുള്ള വികസ്വര ശക്തികള്‍ക്ക് യുഎന്നില്‍ സ്ഥിരമായ ഇരിപ്പിടം ഇല്ലെങ്കില്‍ അതിന്റെ വിശ്വാസ്യത അപകടത്തിലാകുമെന്നും ഇന്ത്യ ഉറപ്പിച്ചു പറയുന്നു.