ബെംഗളൂരു അര്‍ബന്‍ ഡെപ്യൂട്ടി കമ്മീഷണര്‍ കെ ശ്രീനിവാസ്, ബിബിഎംപി സ്‌പെഷ്യല്‍ കമ്മീഷണര്‍ എസ് രംഗപ്പ എന്നിവരെ കര്‍ണാടക സര്‍ക്കാര്‍ സസ്‌പെന്‍ഡ് ചെയ്തു. വോട്ടര്‍മാരുടെ വിവരങ്ങള്‍ ചോര്‍ന്ന സംഭവവുമായി ബന്ധപ്പെട്ടാണ് നടപടി. തിരഞ്ഞെടുപ്പ് കമ്മിഷന്റെ നിര്‍ദേശപ്രകാരമാണ് ഉദ്യോഗസ്ഥരെ സസ്‌പെന്‍ഡ് ചെയ്തത്. കര്‍ണാടക മുഖ്യമന്ത്രി ബസവരാജ് ബൊമ്മൈ വോട്ടര്‍മാരുടെ വിവര ചോര്‍ച്ചയില്‍ നിഷ്പക്ഷമായ അന്വേഷണം നടത്തുമെന്ന് പ്രഖ്യാപിച്ചിരുന്നു.
നവംബര്‍ 17-ന്, ചിലുമേ എജ്യുക്കേഷണല്‍ കള്‍ച്ചറല്‍ ആന്‍ഡ് റൂറല്‍ ഡെവലപ്മെന്റ് ട്രസ്റ്റ് എന്ന എന്‍ജിഒ, ബിബിഎംപി പ്രദേശങ്ങളില്‍ വീടുവീടാന്തരം കയറിയിറങ്ങി ബോധവല്‍ക്കരണ പ്രവര്‍ത്തനങ്ങളുടെ മറവില്‍ ബെംഗളൂരു നഗരത്തിലെ വോട്ടര്‍മാരുടെ വിവരങ്ങള്‍ ശേഖരിക്കുന്നതായുള്ള റിപ്പോര്‍ട്ടുകള്‍ തിരഞ്ഞെടുപ്പ് കമ്മീഷന് ലഭിച്ചിരുന്നു.
സസ്‌പെന്‍ഡ് ചെയ്യപ്പെട്ട രണ്ട് ഐഎഎസ് ഓഫീസര്‍മാരും മണ്ഡലങ്ങളുടെ ചുമതലയുള്ളവരായിരുന്നു. ശിവാജിനഗര്‍, ചിക്ക്‌പേട്ട്, മഹാദേവപുര എന്നീ മൂന്ന് മണ്ഡലങ്ങളില്‍ 2022 ജനുവരി ഒന്നിന് ശേഷമുള്ള വോട്ടര്‍പട്ടികയിലെ ഒഴിവാക്കലുകളും കൂട്ടിച്ചേര്‍ക്കലുകളും പരിശോധിക്കാനും തിരഞ്ഞെടുപ്പ് കമ്മീഷന് ഉത്തരവിട്ടിട്ടുണ്ട്.
അതേസമയം, വോട്ടേഴ്സ് ലിസ്റ്റ് പരിഷ്‌കരണ വിവാദം സംസ്ഥാന സര്‍ക്കാര്‍ നിഷ്പക്ഷമായ രീതിയില്‍ അന്വേഷിക്കുകയാണെന്നും കുറ്റക്കാരായ ഉദ്യോഗസ്ഥര്‍/ സംഘടന/ ഏജന്‍സി എന്നിവര്‍ ശിക്ഷിക്കപ്പെടുമെന്നും മുഖ്യമന്ത്രി ബസവരാജ് ബൊമ്മൈ പറഞ്ഞു.
‘വോട്ടര്‍മാരുടെ പേരുകള്‍ നീക്കം ചെയ്ത വോട്ടര്‍പട്ടിക പരിഷ്‌കരിക്കാന്‍ കേന്ദ്ര തിരഞ്ഞെടുപ്പ് കമ്മീഷന് തീരുമാനിച്ചു. സര്‍ക്കാര്‍ അതിനെ സ്വാഗതം ചെയ്യും. തിരഞ്ഞെടുപ്പ് സ്വതന്ത്രവും നീതിയുക്തവുമായ രീതിയില്‍ നടത്തണം. വോട്ടര്‍മാര്‍ക്ക് തിരിച്ചറിയല്‍ കാര്‍ഡ് ഉണ്ടായിരുന്നിട്ടും ചില സ്ഥലങ്ങളില്‍ ബോധപൂര്‍വം പേരുകള്‍ നീക്കം ചെയ്തു,”- ബസവരാജ് ബൊമ്മൈ പറഞ്ഞു.