ദീപാവലി റിലീസായി തിയേറ്ററുകളിലെത്തിയ കാര്‍ത്തിയുടെ (Karthi) ‘സര്‍ദാര്‍’ (Sardar) മികച്ച പ്രതികരണം നേടി പ്രദര്‍ശനം തുടരുകയാണ്. കാര്‍ത്തിയുടെ ഇരട്ട വേഷത്തിന് പ്രേക്ഷകരുടെ വലിയ കയ്യടിയാണ് ലഭിക്കുന്നത്. കാര്‍ത്തിയുടെ സിനിമ കരിയറിലെ ഏറ്റവും വലിയ മുടക്കുമുതലുള്ള ചിത്രം പി.എസ് മിത്രനാണ് (P.S Mitran) സംവിധാനം ചെയ്തത്.
ചെന്നൈയില്‍ നടന്ന ചടങ്ങില്‍ സര്‍ദാറിന്റെ രണ്ടാം ഭാഗം ഔദ്യോഗികമായി പ്രഖ്യാപിച്ചിരിക്കുകയാണ്. വമ്പന്‍ പ്രഖ്യാപനം കാര്‍ത്തിയുടെ ആരാധകരെ ആവേശത്തിലാക്കിയിട്ടുണ്ട്. സര്‍ദാര്‍ 2ന്റെ ചിത്രീകരണം ഉടന്‍ ആരംഭിക്കുമെന്നും 2023ന്റെ രണ്ടാം പകുതിയോടെ ചിത്രം തിയേറ്ററുകളില്‍ എത്തുമെന്നുമാണ് പ്രതീക്ഷിക്കുന്നത്.
ജി വി പ്രകാശ് കുമാറാണ് സര്‍ദാറിന്റെ സംഗീത സംവിധാനം നിര്‍വഹിച്ചത്. ജോര്‍ജ് സി വില്യംസാണ് ചിത്രത്തിന്റെ ഛായാഗ്രാഹണം നിര്‍വഹിക്കുന്നത്. എസ് ലക്ഷ്മണ്‍ കുമാറാണ് ചിത്രം നിര്‍മ്മിക്കുന്നത്. പ്രിന്‍സ് പിക്‌ചേഴ്‌സിന്റ ബാനറിലാണ് നിര്‍മാണം.
റൂബനാണ് ‘സര്‍ദാര്‍’ എന്ന ചിത്രത്തിന്റെ ചിത്ര സംയോജനം നിര്‍വഹിക്കുന്നത്. ബോളിവുഡ് നടന്‍ ചങ്കി പാണ്ഡെ ചിത്രത്തില്‍ അഭിനയിക്കുന്നുണ്ട്. റാഷി ഖന്ന, രജീഷ വിജയന്‍ എന്നിവരാണ് ചിത്രത്തില്‍ നായികമാരായി എത്തുന്നത്. കേരള പി.ആര്‍.ഒ: പി.ശിവപ്രസാദ്