ദുബൈ പൊലീസിന് 100 വാഹനങ്ങള്‍ സമ്മാനിച്ച്‌ വ്യവസായി. അല്‍ ഹബ്തൂര്‍ ഗ്രൂപ്പ് സ്ഥാപകനും ചെയര്‍മാനുമായ ഖലഫ് അഹ്മദ് അല്‍ ഹബ്തൂരിയാണ് വാഹനങ്ങള്‍ സമ്മാനമായി നല്‍കിയത്.
ദുബൈയിലെ സുരക്ഷ വര്‍ധിപ്പിക്കാനുള്ള പൊലീസിന്‍റെ ശ്രമങ്ങള്‍ക്ക് പിന്തുണ നല്‍കാന്‍ ലക്ഷ്യമിട്ടാണ് വാഹനങ്ങള്‍ നല്‍കിയത്. മിത്സുബിഷി പജേറോ എസ്.യു.വികളാണ് നല്‍കിയത്.
രാജ്യത്തെയും ജനങ്ങളെയും സേവിക്കാന്‍ സര്‍ക്കാരുമായി കൈകോര്‍ക്കുന്നത് സാമൂഹിക ഉത്തരവാദിത്തമാണെന്നും ദുബൈ നല്‍കുന്ന സുരക്ഷയില്‍ അഭിമാനമുണ്ടെന്നും ഖലഫ് അല്‍ ഹബ്തൂരി പറഞ്ഞു. രാജ്യത്തിന്‍റെ സുരക്ഷിതത്വബോധം വര്‍ധിപ്പിക്കുന്നതിന് ദുബൈ പൊലീസുമായി സഹകരിക്കുന്നതില്‍ സന്തോഷമുണ്ടെന്നും അദ്ദേഹം കൂട്ടിചേര്‍ത്തു.
ഹബ്തൂറിന്‍റെ പ്രവൃത്തി അഭിനന്ദനാര്‍ഹമാണെന്ന് ദുബൈ പൊലീസ് കമാന്‍ഡര്‍ ഇന്‍ ചീഫ് ലഫ്റ്റനന്‍റ് ജനറല്‍ അബ്ദുല്ല ഖലീഫ അല്‍ മര്‍റി പറഞ്ഞു. പൊലീസ് പ്രവര്‍ത്തനങ്ങള്‍ വര്‍ധിപ്പിക്കുന്നതിനും ലക്ഷ്യത്തെ പിന്തുണയ്ക്കുന്നതിനും ഈ വാഹനങ്ങള്‍ മുതല്‍ക്കൂട്ടാകുമെന്നും അദ്ദേഹം പറഞ്ഞു. അസിസ്സ്റ്റന്‍റ് കമാന്‍ഡര്‍ ഇന്‍ ചീഫ് അബ്ദുല്ല അലി അല്‍ ഗൈതിയും പങ്കെടുത്തു.