ഇന്ത്യയിലെ രത്‌നഗിരി തീരത്തിന് പടിഞ്ഞാറ് 41 നോട്ടിക്കല്‍ മൈല്‍ അകലെ മുങ്ങിയ ‘എം.ടി ബാര്‍ത്ത്’ എന്ന കപ്പലിലെ ജീവനക്കാരെ രക്ഷിക്കാന്‍ ഇന്ത്യന്‍ കോസ്റ്റ് ഗാര്‍ഡുമായി കൈകോര്‍ത്ത് ഒമാന്‍ കപ്പല്‍.
അസ്യാദ് ഗ്രൂപ്പിന്റെ ‘വാദി ബാനി ഖാലിദ്’ കപ്പലാണ് അപകടത്തില്‍പെട്ട കപ്പലില്‍നിന്ന് 19 പേരെ രക്ഷിച്ചത്. 3,911 ടണ്‍ ചരക്ക് വഹിച്ചുള്ള കപ്പല്‍ ഇന്ത്യന്‍ സംസ്ഥാനമായ കര്‍ണാടകയിലെ മംഗളൂരുവില്‍നിന്ന് ഷാര്‍ജയിലെ ഖുര്‍ഫുക്കന്‍ തുറമുഖത്തേക്ക് പോവുകയായിരുന്നു. ഇതിനിടെ അപകടത്തില്‍പെട്ട കപ്പലില്‍നിന്നുള്ള അടിയന്തര ഫോണ്‍കാള്‍ പതിവു പട്രോളിങ് നടത്തുകയായിരുന്ന ഇന്ത്യന്‍ കോസ്റ്റ് ഗാര്‍ഡിന് ലഭിക്കുകയായിരുന്നു.
ഉടന്‍ അടുത്തുള്ള വാണിജ്യ കപ്പലുകള്‍ക്ക് സഹായത്തിനായി അഭ്യര്‍ഥന അയക്കുകയും ചെയ്തു. ഇതിനോട് പ്രതികരിച്ച അസ്യാദ് ഗ്രൂപ്പിന്റെ വാദി ബാനി ഖാലിദ് കപ്പലാണ് അപകത്തില്‍പെട്ടവരെ രക്ഷിച്ചത്. ആവശ്യമായ വൈദ്യസഹായവും മറ്റും ലഭ്യമാക്കുകയും ചെയ്തു.