കേരളത്തില്‍ മഴക്കെടുതിയില്‍ വീട് നഷ്ടപ്പെട്ട 25 കുടുംബങ്ങളെ ദത്തെടുക്കുമെന്ന് സി.പി.മുഹമ്മദ് മെമ്മോറിയല്‍ ട്രസ്റ്റ് പ്രതിനിധികള്‍ ദുബൈയില്‍ വാര്‍ത്ത സമ്മേളനത്തില്‍ അറിയിച്ചു. വീടുകള്‍ നിര്‍മിച്ചുനല്‍കുകയും ജീവിതോപാധി ഒരുക്കിക്കൊടുക്കുകയും ചെയ്യുന്ന പദ്ധതിയാണ് നടപ്പാക്കുക. വ്യവസായിയും സി.പി. ട്രസ്റ്റ് ചെയര്‍മാനുമായ സി.പി. സാലിഹ് തൃശൂര്‍ ജില്ലയില്‍ ഇതിനായി ഒരേക്കറിലേറെ വരുന്ന സ്വന്തം സ്ഥലം നീക്കിവെച്ചിട്ടുണ്ടെന്നും അറിയിച്ചു. കുടുംബങ്ങള്‍ക്ക് എല്ലാ അടിസ്ഥാന സൗകര്യങ്ങളോടുംകൂടിയ വീടാണ് ട്രസ്റ്റ് ഒരുക്കുക.
കൃഷി, കന്നുകാലി ഫാം, കെട്ടിടനിര്‍മാണം തുടങ്ങിയ മേഖലകളില്‍ ജോലി ചെയ്യാന്‍ അവസരവും ഒരുക്കും. കുട്ടികളുടെ വിദ്യാഭ്യാസം, കലാകായിക വിനോദങ്ങള്‍, കരകൗശല നിര്‍മാണ പരിശീലനം തുടങ്ങിയ സൗകര്യങ്ങളും മുതിര്‍ന്ന കുട്ടികള്‍ക്ക് തൊഴില്‍ പരിശീലനകേന്ദ്രവും സ്ഥാപിക്കും. ഇവിടെ പരിശീലനം പൂര്‍ത്തിയാക്കുന്നവര്‍ക്ക് യു.എ.ഇയില്‍ സി.പി. സാലിഹിന്‍റെ ഉടമസ്ഥതയില്‍ പ്രവര്‍ത്തിക്കുന്ന ആസ ഗ്രൂപ് സ്ഥാപനങ്ങളില്‍ മുന്‍ഗണന നല്‍കുമെന്നും ട്രസ്റ്റ് പ്രതിനിധികള്‍ പറഞ്ഞു.
പ്രദേശത്തെ ജനപ്രതിനിധികളുടെയും ജില്ല കലക്ടര്‍മാരുടെയും ശിപാര്‍ശ അനുസരിച്ചാവും ഉപഭോക്താക്കളെ കണ്ടെത്തുകയെന്നും ബൃഹത്തായ പദ്ധതി മന്ത്രി കെ. രാജനുമായി പങ്കുവെച്ചിട്ടുണ്ടെന്നും ഇവര്‍ വ്യക്തമാക്കി. കോവിഡ് കാലത്ത് സൗജന്യ വാക്സിന്‍ വിതരണം, കേരളത്തിലുടനീളം കുടിവെള്ള വിതരണം, വിധവ പെന്‍ഷന്‍ വിതരണം തുടങ്ങിയ നിരവധി പദ്ധതികള്‍ ട്രസ്റ്റ് മുന്‍കൈയെടുത്ത് കഴിഞ്ഞ കാലത്ത് നടപ്പാക്കിയിട്ടുണ്ട്. ആസ ഗ്രൂപ് സി.ഇ.ഒ ഫാരിസ് അബൂബക്കര്‍, ജന. മാനേജര്‍ ഇബ്രാഹിംകുട്ടി, ബിസിനസ് ഡെവലപ്മെന്‍റ് മാനേജര്‍ അറാഫത്ത് എം. അന്‍സാരി, കമ്ബനി സെക്രട്ടറി ഷെമി ജൗഹര്‍ എന്നിവര്‍ പങ്കെടുത്തു.