നിവിന് പോളിയെ നായകനാക്കി രാജീവ് രവി സംവിധാനം ചെയ്യുന്ന ചിത്രമായ തുറമുഖത്തിന്റെ റിലീസിനായി കാത്തിരിക്കുകയാണ് ആരാധകര്. ചിത്രത്തിന്റെ റിലീസുമായി ബന്ധപ്പെട്ട അനിശ്ചിതത്വം തുടരുകയാണ്. ഇപ്പോള് ഇതാ ചിത്രത്തിന്റെ റിലീസുമായി ബന്ധപ്പെട്ട വിവരം പുറത്തതുവിട്ടിരിക്കുകയാണ് നിര്മ്മാതാവ് ലിസ്റ്റിന് സ്റ്റീഫന്.
ഡിസംബറിന് മുമ്പ് തുറമുഖം തിയേറ്ററുകളില് എത്തിക്കുമെന്ന് ലിസ്റ്റിന് പറഞ്ഞു. ‘കുമാരി’ സിനിമയുടെ പ്രമോഷനുമായി ബന്ധപ്പെട്ട് നടന്ന വാര്ത്താ സമ്മേളനത്തിലായിരുന്നു ലിസ്റ്റിന്റെ പ്രതികരണം. ഫിനാന്ഷ്യല് സെറ്റില്മെന്റുമായി ബന്ധപ്പെട്ട പ്രശ്നങ്ങളാണ് റിലീസ് വൈകുന്നതിന് പ്രധാന കാരണമായി ഉണ്ടായിരുന്നത്.
‘കമ്മട്ടിപ്പാടം’എന്ന ഹിറ്റ് ചിത്രത്തിനു ശേഷം രാജീവ് രവി സംവിധാനം ചെയ്യുന്ന ചിത്രമാണ് ‘തുറമുഖം’. ഇതിനോടകം തന്നെ വിവിധ ചലച്ചിത്രമേളകളില് സാന്നിധ്യം അറിയിച്ച ചിത്രത്തില് വന് താരനിരയാണ് അണിനിരക്കുന്നത്. നിവിന് പോളി, നിമിഷ സജയന്, ഇന്ദ്രജിത്ത് സുകുമാരന്, ജോജു ജോര്ജ്, പൂര്ണിമ ഇന്ദ്രജിത്ത്, അര്ജുന് അശോകന്, സുദേവ് നായര്, മണികണ്ഠന് ആചാരി എന്നിങ്ങനെ വമ്പന് താരനിര തന്നെ ചിത്രത്തില് അണിനിരക്കുന്നുണ്ട്.
1950കളുടെ പശ്ചാത്തലത്തിലാണ് ചിത്രം ഒരുങ്ങുന്നത്. കലുഷിതമായ കാലഘട്ടത്തിലൂടെ കടന്നുപോകുന്ന ഒരു കുടുബത്തിന്റെയും ഒരു നാടിന്റെയും അതിജീവനത്തിന്റെ കഥയാണ് തുറമുഖം. നന്മക്കും തിന്മക്കും ഇടയില്, ദുരന്തത്തിനും വീരോചിതമായ ചെറുത്തുനില്പിനും ഇടയില്, പ്രത്യാശക്കും നിരാശക്കും ഇടയില് ഉലയുന്ന രണ്ടു തലമുറകളുടെ കഥ.
കൊച്ചി തുറമുഖം പശ്ചാത്തലമാക്കിയാണ് ചിത്രം ഒരുങ്ങുന്നത്. രാജീവ് രവിയും നിവിന് പോളിയും ഒന്നിക്കുന്ന ആദ്യ സിനിമ കൂടിയാണ് ‘തുറമുഖം’. റോട്ടര്ഡാം രാജ്യാന്തര ചലച്ചിത്രോത്സവത്തിലേക്ക് തിരഞ്ഞെടുക്കപ്പെട്ട ചിത്രം മേളയിലെ മത്സര വിഭാഗത്തില് പ്രദര്ശിപ്പിച്ചിരുന്നു.
ഗോപന് ചിദംബരമാണ് തുറമുഖത്തിന്റെ തിരക്കഥ സംഭാഷണമെഴുതുന്നത്. എഡിറ്റര് ബി അജിത്കുമാര്, പ്രൊഡക്ഷന് ഡിസൈനര്- ഗോകുല് ദാസ്. തെക്കേപ്പാട്ട് ഫിലിംസിന്റെ ബാനറില് സുകുമാര് തെക്കേപ്പാട്ട് നിര്മ്മിക്കുന്ന മൂന്നാമത്തെ ചിത്രമാണ് ‘തുറമുഖം.