ഏറ്റവും മോശം വരാൻ ഇരിക്കുന്നതേയുള്ളു; ഐഎംഎഫിന്റെ ആഗോള വളർച്ച റിപ്പോർട്ട് സൂചിപ്പിക്കുന്നതെന്ത്?

ഇതുവരെ കണ്ടതൊന്നും ഒന്നുമല്ല, ഏറ്റവും മോശം വരാൻ ഇരിക്കുന്നതേയുള്ളു, ഐഎംഎഫിന്റെ ആഗോള വളർച്ച റിപ്പോർട്ടിനെ ഒറ്റയടിക്ക് വിശേഷിപ്പിച്ചാൽ ഇങ്ങനെയിരിക്കും. ലോക സമ്പദ്വ്യവസ്ഥയുടെ വളർച്ച അടുത്ത വർഷം മന്ദഗതിയിലാകുമെന്ന് രാജ്യാന്തര നാണയ നിധിയുടെ (ഐഎംഎഫ്) പ്രവചനം. റഷ്യ- യുക്രൈൻ യുദ്ധം, കൊവിഡ്, പണപ്പെരുപ്പം, സാമ്പത്തികമാന്ദ്യ ഭീതി അങ്ങനെ എല്ലാം റിപ്പോർട്ടിൽ പരാമർശിക്കപ്പെട്ടിട്ടുണ്ട്.

നടപ്പു സാമ്പത്തിക വർഷത്തെ ആദ്യ പാദ പ്രകടനം കണക്കിലെടുത്ത് സാമ്പത്തിക വർഷത്തെ ഇന്ത്യയുടെ വളർച്ചാ അനുമാനവും ഐഎംഎഫ് കുറച്ചിട്ടുണ്ട്. മുൻ പ്രവചനത്തേക്കാൾ 60 ബേസിസ് പോയിന്റിന്റെ കുറവാണ് വരുത്തിയത്. നടപ്പു വർഷം ഇന്ത്യയുടെ വളർച്ച 6.8 ശതമാനമായിരിക്കുമെന്ന് ഐഎംഎഫ് പ്രവചിച്ചു. മുമ്പ് പ്രവചനം 7.4 ശതമാനമായിരുന്നു. അതേസമയം 2024 സാമ്പത്തിക വർഷത്തെ ഇന്ത്യയുടെ വളർച്ചാ അനുമാനം 6.1 ശതമാനമായി നിലനിർത്തിയെന്നതും ശ്രദ്ധേയമാണ്.

യുഎൻ സാമ്പത്തിക ഏജൻസി പങ്കിട്ട ഡാറ്റ പ്രകാരം വികസിത, വികസ്വര രാജ്യങ്ങളുടെ വളർച്ച പട്ടികയിൽ ഇന്ത്യ ഒന്നാം സ്ഥാനത്ത് തുടരുന്നുവെന്നതും ശ്രദ്ധേയമാണ്. മറ്റു സമ്പദ്‌ വ്യവസ്ഥകൾ വലിയ തിരിച്ചടികൾ നേരിടുമ്പോൾ ഇന്ത്യ പിടിച്ചു നിൽക്കുന്നുവെന്നു വ്യക്തമാക്കുന്നതാണ് ഈ നിരീക്ഷണം. 2022 ഇന്ത്യ നല്ല നിലയിൽ നീങ്ങി, 2023 ലും ശക്തമായ വളർച്ച പ്രതീക്ഷിക്കുന്നു. ഈ വർഷം ഇന്ത്യ 6.8 ശതമാനവും, അടുത്ത വർഷം 6.1 ശതമാനവും വളരുമെന്നു പ്രതീക്ഷിക്കുന്നതായി ഐഎംഎഫ് ചീഫ് ഇക്കണോമിസ്റ്റ് പിയറി ഒലിവർ ഗോറിഞ്ചസ് വ്യക്തമാക്കി.

ഐഎംഎഫ് റിപ്പോർട്ട് പ്രകാരം നടപ്പുവർഷം ആഗോള സമ്പദ്‌വ്യവസ്ഥകളിൽ മികച്ച നമ്പറുകൾ രേഖപ്പെടുത്തിയതും ഇന്ത്യയാണ്. രണ്ടാം സ്ഥാനത്തുള്ള ചൈനയുടെ വളർച്ച അനുമാനം 4.4 ശതമാനമാണ്. അമേരിക്കയുടെ വളർച്ച നിരക്ക് പ്രവചനം ഒരു ശതമാനം മാത്രമാണ്. ജപ്പാൻ 1.6 ശതമാനവും, കാനഡ 1.5 ശതമാനവും, ബ്രസീൽ ഒരു ശതമാനവും വളർച്ച പ്രതീക്ഷിക്കുന്നു. അതേസമയം ഇന്ത്യയിൽ പണപ്പെരുപ്പം ഇപ്പോഴും ആർബിഐ ലക്ഷ്യത്തിന് മുകളിലാണെന്നും അവർ കൂട്ടിച്ചേർത്തു.

കൊവിഡിനു ശേഷം തിരിച്ചുവരവിനു ശ്രമിക്കുന്ന സമ്പദ്‌വ്യവസ്ഥകൾക്ക് ഈ വർഷവും വെല്ലുവിളി നിറഞ്ഞതാകുമെന്നു റിപ്പോർട്ടിൽ പറയുന്നു. അതിനാൽ തന്നെ ഇത് ആഗോള വളർച്ച നിരക്കുകളെയും ബാധിക്കും. ഐഎംഎഫ് 2023 ലെ ആഗോള ജിഡിപി പ്രവചനം 2.7 ശതമാനമാക്കി കുറച്ചു. ജൂലൈയിൽ പ്രവചിച്ച നിരക്കുകളേക്കാൾ 0.2 പോയിന്റ് കുറവാണിത്. ഈ വർഷത്തെ ലോക വളർച്ചാ പ്രവചനം മാറ്റമില്ലാതെ 3.2 ശതമാനമായി തുടരുന്നു.

ഏറ്റവും മോശമായത് ഇനിയും വരാനിരിക്കുന്നതേയുള്ളൂ, പലർക്കും 2023 മാന്ദ്യമായി അനുഭവപ്പെടുമെന്നു ഗൗറിഞ്ചാസ് പറഞ്ഞു. അടുത്ത വർഷം സാമ്പത്തികമാന്ദ്യം ഇണ്ടാകുമെന്നു നേരത്തേ വിവിധ കമ്പനികളുടെ സിഇഒമാർ പ്രതികരിച്ചതും ഐഎംഎഫ് റിപ്പോർട്ടുമായി ചേർത്തു വായിക്കേണ്ടതുണ്ട്.

ഏപ്രിൽ- ജൂൺ മാസങ്ങളിൽ ഇന്ത്യൻ സമ്പദ്വ്യവസ്ഥ 13.5% വളർച്ച കൈവരിച്ചതായി ഓഗസ്റ്റ് അവസാനം പുറത്തുവിട്ട ഡാറ്റ വ്യക്തമാക്കുന്നുണ്ട്. നിരക്കുകൾ ആകർഷകമാണെങ്കിലും പ്രവചനങ്ങളേക്കാൾ ഏറെ അകലെയാണിത് എന്നതാണു സത്യം. പാദത്തിൽ ഇന്ത്യ 15 ശതമാനം വളർച്ച കൈവരിച്ചേക്കുമെന്നു സാമ്പത്തിക വിദഗ്ധരും, 16.2 ശതമാനം വളരുമെന്നു ആർബിഐയും പ്രവചിച്ചിരുന്നു. 2022- 23 ലെ ഐഎംഎഫിന്റെ പ്രവചനം റിസർവ് ബാങ്ക് ഓഫ് ഇന്ത്യയുടെ പ്രൊജക്ഷനേക്കാൾ 20 ബേസിസ് പോയിന്റ് കുറവാണെന്നതും ശ്രദ്ധിക്കേണ്ട കാര്യമാണ്.

ഈ വർഷം ചൈനയുടെ സമ്പദ്വ്യവസ്ഥ 3.2% വളർച്ച നേടുമെന്ന് ഫണ്ട് പ്രവചിക്കുന്നു. കഴിഞ്ഞ വർഷത്തെ 8.1 ശതമാനത്തേക്കാൾ വളരെ കുറവാണിത്. സീറോ കൊവിഡ് നയങ്ങളെ തുടർന്നു മാസങ്ങളായി സമ്പദ്‌വ്യവസ്ഥ നിയന്ത്രണങ്ങളിലൂടെ കടന്നു പോകുന്നതാണ് ഇതിനു കാരണം. റഷ്യ- യുക്രൈൻ യുദ്ധം ഭക്ഷ്യ- ഊർജ്ജ വിലകൾ വർദ്ധിപ്പിച്ചെന്നും, കുതിച്ചുയരുന്ന ചെലവുകളും പലിശനിരക്കും ലോകമെമ്പാടും പ്രതിധ്വനിക്കുമെന്നും റിപ്പോർട്ടിൽ വ്യക്തമാണ്.