2022 മെയ് വരെയുള്ള കണക്കുകൾ പ്രകാരം 50 ദശലക്ഷത്തിലധികം ആളുകൾ എൻപിഎസിൽ അംഗങ്ങളാണ്. എന്നാൽ പെൻഷൻ ഫണ്ട് റെഗുലേറ്ററി ആൻഡ് ഡെവലപ്‌മെന്റ് അതോറിറ്റിയും (PFRDA) ഇൻഷുറൻസ് റെഗുലേറ്ററി ആൻഡ് ഡെവലപ്‌മെന്റ് അതോറിറ്റി ഓഫ് ഇന്ത്യയും (IRDAI) അടുത്തിടെ ചില മാറ്റങ്ങൾ കൊണ്ടുവന്നു. സർക്കാർ പിന്തുണയുള്ള സ്കീമിൽ നിക്ഷേപം നടത്താൻ പദ്ധതിയിടുന്ന ആളുകൾ ഏറ്റവും പുതുതായി വന്നിട്ടുള്ള മാറ്റങ്ങളെക്കുറിച്ച് അറിഞ്ഞിരിക്കണം.
PFRDA നിയന്ത്രിക്കുന്ന സേവിംഗ്സ് സ്കീമാണ് എൻപിഎസ്. എൻപിഎസിൽ വിവിധ റിട്ടയർമെന്റ് സ്കീമുകൾ ഉണ്ട്. അടൽ പെൻഷൻ യോജനയാണ് അതിൽ ഏറ്റവും ജനപ്രിയമായത്. റെഗുലേറ്ററി ബോഡി പ്രഖ്യാപിച്ച ഏറ്റവും പുതിയ മാറ്റങ്ങൾ നോക്കാം.
NPS ഇ-നോമിനേഷൻ പ്രക്രിയകളിൽ മാറ്റം
ഗവൺമെന്റ്, കോർപ്പറേറ്റ് മേഖലയിലെ വരിക്കാർക്കുള്ള ഇ-നോമിനേഷൻ പ്രക്രിയകൾ പരിഷ്‌ക്കരിച്ചിട്ടുണ്ട്. ഇനി മുതൽ അപേക്ഷകന്റെ ഇ നോമിനേഷൻ ആരംഭിച്ചതിന് ശേഷവും നോഡൽ ഓഫീസിന് അഭ്യർത്ഥന നിരസിക്കാനോ സ്വീകരിക്കാനോ അധികീരം ഉണ്ടായിരിക്കുമെന്ന് പിഎഫ്ആർഡിഎ പ്രസ്താവിച്ചു. അഭ്യർത്ഥന നടത്തി 30 ദിവസത്തിനുള്ളിൽ നോഡൽ ഓഫീസ് നടപടിയൊന്നും ആരംഭിച്ചില്ലെങ്കിൽ അത് സിആർഎ സിസ്റ്റത്തിൽ സ്വീകരിക്കപ്പെടും. ഇ-നോമിനേഷൻ പ്രോസസിലെ പുനരവലോകനം 2022 ഒക്‌ടോബർ 1 മുതൽ പ്രാബല്യത്തിൽ വരും. ഇപ്പോഴും അനധികൃതമായ നിലവിലുള്ള ഇ-നോമിനേഷനുകൾക്ക് പുതുക്കിയ പ്രോസസ്സ് ഫ്ലോ ബാധകമായിരിക്കുമെന്ന് PFRDA വ്യക്തമാക്കി.
കാലാവധി പൂർത്തിയാകുമ്പോൾ ആന്വിറ്റി പ്ലാൻ വാങ്ങുന്നതിനുള്ള ഫോം
കാലാവധി പൂർത്തിയാകുമ്പോൾ ആന്വിറ്റി ഉൽപ്പന്നങ്ങൾ വാങ്ങുന്നതിന് പ്രത്യേക പ്രൊപ്പോസൽ ഫോം സമർപ്പിക്കേണ്ടതിന്റെ ആവശ്യകതയിൽ ഐആർഡിഎഐ സെപ്റ്റംബർ 13-ന് ഇളവ് വരുത്തി. മുതിർന്ന പൗരന്മാർക്ക് കാര്യങ്ങൾ കുറേക്കൂടി എളുപ്പമാക്കുന്നതിനാണിത്. സെപ്റ്റംബർ 13 മുതലാണ് ഈ നിയമം പ്രാബല്യത്തിൽ വന്നത്. നേരത്തെ എൻപിഎസ് നിക്ഷേപകർ പെൻഷൻ ലഭിക്കുന്നതിന് ഒരു ആന്വിറ്റി പ്ലാൻ വാങ്ങുന്നതിന് പിഎഫ്ആർഡിഎയ്ക്ക് എക്സിറ്റ് ഫോമും ലൈഫ് ഇൻഷുറൻസ് കമ്പനിക്ക് വിശദമായ നിർദ്ദേശ ഫോമും സമർപ്പിക്കണമായിരുന്നു. എന്നാൽ ഇനി മുതൽ ലൈഫ് ഇൻഷുറൻസ് കമ്പനികളിൽ നിന്ന് ആന്വിറ്റികൾ വാങ്ങുന്നതിനുള്ള പ്രൊപ്പോസൽ ഫോമായി എൻപിഎസിന്റെ എക്സിറ്റ് ഫോം പരിഗണിക്കും.
ഡിജിറ്റൽ ലൈഫ് സർട്ടിഫിക്കറ്റ്
കാലാവധി പൂർത്തിയാകുമ്പോൾ ആന്വിറ്റി ഉൽപ്പന്നങ്ങൾ വാങ്ങുന്നതിന് പ്രത്യേക പ്രൊപ്പോസൽ ഫോം സമർപ്പിക്കേണ്ടതിന്റെ ആവശ്യകതയിൽ ഇളവ് വരുത്തുന്നതിനൊപ്പം എൻപിഎസ് പെൻഷൻകാർക്ക് ഇനി മുതൽ ലൈഫ് സർട്ടിഫിക്കറ്റ് ഡിജിറ്റലായി സമർപ്പിക്കാമെന്നും റെഗുലേറ്റർ അറിയിച്ചു. ബയോമെട്രിക് പ്രവർത്തനക്ഷമമാക്കിയ ഡിജിറ്റൽ സേവനത്തെക്കുറിച്ചുള്ള ഇന്ത്യാ ഗവൺമെന്റ് സംരംഭമായ ജീവൻ പ്രമാൺ പോലെയുള്ള ലൈഫ് സർട്ടിഫിക്കറ്റിന്റെ പരിശോധനയ്ക്കായി ആധാർ അടിസ്ഥാനമാക്കിയുള്ള ഡോക്യുമെന്റേഷൻ സ്വീകരിക്കാൻ ഇൻഷുറർമാരെ ഉപദേശിച്ചു.
എൻപിഎസ് ടയർ-2 അക്കൗണ്ട് ഉടമകളുടെ ക്രെഡിറ്റ് കാർഡ്
ആഗസ്റ്റ് 3 മുതൽ എൻപിഎസ് ടയർ-2 അക്കൗണ്ട് ഉടമകൾക്ക് ക്രെഡിറ്റ് കാർഡുകൾ വഴി പണമടയ്ക്കുന്നത് അനുവദിക്കുന്നില്ലെന്ന് പിഎഫ്ആർഡിഎ.NPS-ന്റെ Tier-II അക്കൗണ്ടിലെ പേയ്‌മെന്റ് രീതിയായി ക്രെഡിറ്റ് കാർഡ് ഉപയോഗിച്ച് സബ്‌സ്‌ക്രിപ്ഷനുകൾ/സംഭാവനകൾ അടയ്ക്കുന്നതിനുള്ള സൗകര്യം നിർത്താൻ അതോറിറ്റി തീരുമാനിച്ചുവെന്ന് കഴിഞ്ഞ മാസം ഒരു സർക്കുലറിൽ പറഞ്ഞു. എന്നാൽ എൻപിഎസ് ടയർ-1 അക്കൗണ്ട് ഉടമകൾക്ക് നിലവിൽ ക്രെഡിറ്റ് കാർഡുകളിൽ നിന്ന് പണമടയ്ക്കാം.