രാജ്യത്തിന്റെ കയറ്റുമതി വർദ്ധിപ്പിക്കുകയെന്ന ലക്ഷ്യത്തോടെ കേന്ദ്ര വാണിജ്യ മന്ത്രാലയം സെപ്റ്റംബർ 29- ന് പുതിയ വിദേശ വ്യാപാര നയം പ്രഖ്യാപിക്കുമെന്ന് വിലയിരുത്തൽ. അഞ്ചു വർഷം കാലം മുന്നിൽ കണ്ടാകും പുതിയ നയം അവതരിപ്പിക്കുക. ഇന്ത്യയെ ആഗോള കയറ്റുമതി ഹബാക്കി മാറ്റുകയാണ് പ്രധാന ലക്ഷ്യം. നിലവിലെ വിദേശ വ്യാപാര നയം (2015- 20) സെപ്റ്റംബർ 30 വരെ പ്രാബല്യത്തിൽ തുടരും.
2020 മാർച്ച് 31- ന് അവസാനിക്കേണ്ടിയിരുന്ന നയം കൊവിഡ് 19- നെ തുടർന്ന് ഒരു വർഷത്തേയ്ക്കു കൂടി നീട്ടുകയായിരുന്നു. ഈ വർഷം മാർച്ച് 31- ന് കാലാവധി സെപ്റ്റംബർ 30 വരെ വീണ്ടും നീട്ടുകയായിരുന്നു. ചരക്കുകളുടെയും സേവനങ്ങളുടെയും കയറ്റുമതിക്കാർക്കു നയത്തിൽ വലിയ പിന്തുണയുണ്ടാകുമെന്നാണു സൂചന. ആഗോളതലത്തിൽ മത്സരം വർധിപ്പിക്കുക കൂടി നയം ലക്ഷ്യമിടുന്നു. സെപ്റ്റംബർ 29- ന് തന്നെ പുതിയ നയം അവതരിപ്പിക്കുമെന്നു സർക്കാരുമായി അടുത്തവൃത്തങ്ങൾ വ്യക്തമാക്കുന്നു.
കൊവിഡ്, പണപ്പെരുപ്പം, ആഗോളമാന്ദ്യ ഭീഷണി, യുദ്ധം എന്നിവയുടെ പശ്ചാത്തലത്തിൽ അവതരിപ്പിക്കുന്ന നയം വ്യാപാരികൾക്കും, വിവിധ മേഖലകൾക്കും കൂടുതൽ ഊർജം പകരുന്നതായിരിക്കുമെന്നാണു സൂചന. ജില്ലകളെ കയറ്റുമതി കേന്ദ്രങ്ങളായി ഉപയോഗിക്കാനുള്ള പദ്ധതി നയം മുന്നോട്ടുവച്ചേക്കും. രാജ്യത്തെ എല്ലാ ജില്ലയിൽ നിന്നും ഒരു ഉൽപ്പന്നം കണ്ടെത്തി പരമാവധി കയറ്റുമതി പ്രാധാന്യം നൽകണമെന്നു അധികൃതർക്കു കേന്ദ്ര ധനമന്ത്രി നിർമല സീതാരാമൻ നേരത്തേ നിർദേശം നൽകിയിരുന്നു.
ഗണ്യമായ കയറ്റുമതി സാധ്യതയുള്ള സ്‌കെയിലബിൾ ഉൽപ്പന്നങ്ങൾ വാഗ്ദാനം ചെയ്യുന്ന തിരഞ്ഞെടുത്ത ജില്ലകളുടെ ഒരു ഗ്രൂപ്പിലേക്ക് ആദ്യം ശ്രദ്ധ നൽകാനാണു സാധ്യത. ഈ സാമ്പത്തിക വർഷത്തിലെ ഏപ്രിൽ മുതൽ ഓഗസ്റ്റ് വരെയുള്ള മാസങ്ങളിൽ, രാജ്യത്തിന്റെ കയറ്റുമതി 17.68 ശതമാനം വർധിച്ച് 193.51 ബില്യൺ ഡോളറിലെത്തിയിരുന്നു. അതേസമയം ഇറക്കുമതിയും 45.74 ശതമാനം വർധിച്ച് 318 ബില്യൺ ഡോളറിലെത്തി.
ഇറക്കുമതി കുറയ്ക്കുക, കയറ്റുമതി വർധിപ്പിക്കുക എന്നതാണ് ഇന്ത്യയുടെ പ്രഖ്യാപിത ലക്ഷ്യം. 2021 ഏപ്രിൽ മുതൽ ഓഗസ്റ്റ് വരെയുള്ള കാലയളവിൽ വ്യാപാര കമ്മി 53.78 ബില്യൺ ഡോളറിൽ നിന്ന് 124.52 ബില്യൺ ഡോളറായി കുതിച്ചത് വെല്ലുവിളിയാണ്.