രാജ്യത്ത് നികുതി വരുമാനത്തിൽ വൻ വർധന. ഈ സാമ്പത്തിക വർഷം സെപ്റ്റംബർ 8 വരെ നേരിട്ടുള്ള നികുതി പിരിവ് 35.46 ശതമാനം വർധിച്ച് 6.48 ലക്ഷം കോടി രൂപയായി ഉയർന്നതായി ധനമന്ത്രാലയം വ്യക്തമാക്കി. ഇതിൽ വ്യക്തിഗത ആദായനികുതിയും ഉൾപ്പെടുന്നു. പ്രത്യക്ഷ നികുതി വരുമാനം സൂചിപ്പിക്കുന്നത് ഇന്ത്യയുടെ സമ്പദ് വ്യവസ്ഥയുടെ തിരിച്ചുവരവാണ്. 2022 ജൂൺ 30ന് അവസാനിച്ച ആദ്യ പാദത്തിൽ രാജ്യം 13.5 ശതമാനം ജിഡിപി വളർച്ച രേഖപ്പെടുത്തിയിരുന്നു.
നികുതി പിരിവിനൊപ്പം റീഫണ്ടും വർധിച്ചതായി റിപ്പോർട്ടുകൾ വ്യക്തമാക്കുന്നു. നടപ്പു വർഷത്തെ നികുതി വരുമാനം 2022- 23 ലെ പ്രത്യക്ഷ നികുതികളുടെ മൊത്തം ബജറ്റ് എസ്റ്റിമേറ്റിന്റെ 37.24 ശതമാനമാണെന്ന് ധനമന്ത്രാലയം പറഞ്ഞു. 2022 ഏപ്രിൽ 1 മുതൽ സെപ്റ്റംബർ 8 വരെ 1.19 ലക്ഷം കോടി രൂപയുടെ റീഫണ്ടുകൾ അനുവദിച്ചു. ഇത് മുൻ വർഷം ഇതേ കാലയളവിൽ നൽകിയ റീഫണ്ടുകളേക്കാൾ 65.29 ശതമാനം കൂടുതലാണ്.
കോർപ്പറേറ്റ് ആദായനികുതി (CIT), വ്യക്തിഗത ആദായനികുതി (PIT) എന്നിവയുടെ മൊത്ത വരുമാന ശേഖരണം കണക്കാക്കുമ്പോൾ, സിഐടി വളർച്ചാ നിരക്ക് 25.95 ശതമാനവും, പിഐടി (എസ്ടിടി ഉൾപ്പെടെ) വളർച്ചാ നിരക്ക് 44.37 ശതമാനവുമാണ്. റീഫണ്ടുകൾക്കു ശേഷം സിഐടി അറ്റ വളർച്ച 32.73 ശതമാനവും പിഐടി (എസ്ടിടി ഉൾപ്പെടെ) വളർച്ച 28.32 ശതമാനവുമാണ്. 2022 മാർച്ച് 31 ന് അവസാനിച്ച അവസാന സാമ്പത്തിക വർഷത്തിൽ ഇന്ത്യയുടെ പ്രത്യക്ഷ നികുതി പിരിവ് 49 ശതമാനം ഉയർന്ന് 14.10 ലക്ഷം കോടി രൂപയായി.
നടപ്പു സാമ്പത്തിക വർഷം പ്രത്യക്ഷ നികുതിയിനത്തിൽ 14.20 ലക്ഷം കോടി രൂപ സമാഹരിക്കുമെന്നാണ് സർക്കാർ കണക്കാക്കുന്നത്. ഇതിൽ കോർപ്പറേറ്റ് നികുതിയിൽ നിന്നുള്ള 7.20 ലക്ഷം കോടിയും, വ്യക്തിഗത നികുതിദായകരിൽ നിന്ന് 7 ലക്ഷം കോടിയും ലക്ഷ്യമിടുന്നു. 2022 ഓഗസ്റ്റിൽ സമാഹരിച്ച മൊത്തം ജിഎസ്ടി (GST) വരുമാനം മുൻ വർഷത്തെ അപേക്ഷിച്ച് 28 ശതമാനം ഉയർന്ന് 1,43,612 കോടി രൂപയായി. ഇതോടെ, പ്രതിമാസ ജിഎസ്ടി വരുമാനം ആറുമാസം തുടർച്ചയായി 1.4 ലക്ഷം കോടി രൂപ കവിഞ്ഞു.
ഓഗസ്റ്റിലെ മൊത്തം ജിഎസ്ടി വരുമാനം 1,43,612 കോടി രൂപയായിരുന്നു. അതിൽ സിജിഎസ്ടി (CGST) 24,710 കോടി രൂപ, എസ്ജിഎസ്ടി (SGST) 30,951 കോടി രൂപ, ഐജിഎസ്ടി (IGST) 77,782 കോടി രൂപ, ഇറക്കുമതി വരുമാനം 42,067 കോടി രൂപ എന്നിവ ഉൾപ്പെടുന്നു. സെസ് 10,168 കോടി രൂപയാണ്. കഴിഞ്ഞ വർഷം ഓഗസ്റ്റിൽ ജിഎസ്ടി വരുമാനം 1,12,020 കോടി രൂപയായിരുന്നു. കഴിഞ്ഞ വർഷത്തെ അപേക്ഷിച്ച് ഇത്തവണ വരുമാനം 28 ശതമാനം വർധിച്ചിട്ടുണ്ട്.