തിരുവനന്തപുരം: സംസ്ഥാനത്ത് ഒരാള്‍ക്ക് കൂടി വാനരവസൂരി സ്ഥിരീകരിച്ചതായി ആരോഗ്യ മന്ത്രി വീണാ ജോര്‍ജ് അറിയിച്ചു. 30കാരനായ രോഗബാധിതൻ മലപ്പുറത്ത് ചികിത്സയിലാണ്.
ജൂലൈ 27ന് യുഎ.ഇയില്‍ നിന്നാണ് ഇദ്ദേഹം കോഴിക്കോട് എയര്‍പോര്‍ട്ടില്‍ എത്തിയത്. ഇദ്ദേഹവുമായി അടുത്ത സമ്പര്‍ക്കത്തിലുള്ള അമ്മ, അച്ഛന്‍, രണ്ട് സുഹൃത്തുക്കള്‍ എന്നിവരെ നിരീക്ഷണത്തിലാക്കി.
സംസ്ഥാനത്ത് ഇതോടെ അഞ്ച് പേര്‍ക്കാണ് മങ്കിപോക്‌സ് സ്ഥിരീകരിച്ചത്. ആദ്യ രോഗിയെ കഴിഞ്ഞ ദിവസം ഡിസ്ചാര്‍ജ് ചെയ്തിരുന്നു. ആശുപത്രിയില്‍ ചികിത്സയിലുള്ള മറ്റുള്ളവരുടെ ആരോഗ്യനില തൃപ്തികരമായി തുടരുകയാണെന്നും മന്ത്രി അറിയിച്ചു.
രാജ്യത്തെ ആദ്യ വാനര വസൂരി മരണം കഴിഞ്ഞ ദിവസം തൃശൂരിൽ സ്ഥിരീകരിച്ചിരുന്നു. ചാവക്കാട് പുന്നയൂരിൽ ആശുപത്രിയിൽ ചികിത്സയിലിരിക്കെ മരിച്ച യുവാവിനാണ് വാനര വസൂരി സ്ഥിരീകരിച്ചത്. സ്രവസാമ്പിളുകൾ ആലപ്പുഴയിലെ വൈറോളജി ലാബിൽ പരിശോധിച്ചതിലൂടെയാണ് രോഗം കണ്ടെത്തിയത്.