ന്യൂഡൽഹി: പ്രശസ്ത ഒഡിയ നടൻ റായിമോഹൻ പരീദ(58) യെ വീട്ടിൽ തൂങ്ങിമരിച്ച നിലയിൽ കണ്ടെത്തി. ഭുവനേശ്വറിലെ പ്രാചി വിഹാറിലെ വസതിയിൽ വെള്ളിയാഴ്ചയായിരുന്നു സംഭവം.
ആത്മഹത്യയിലേക്കാണ് സാഹചര്യത്തെളിവുകൾ വിരൽ ചൂണ്ടുന്നതെന്ന് പോലീസിനെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്തു.
കുടുംബാംഗങ്ങളാണ് രാവിലെ റായിമോഹനെ കിടപ്പുമുറിയിൽ മരിച്ചനിലയിൽ കണ്ടെത്തിയത്. മരണകാരണം പോലീസ് അന്വേഷിച്ച് വരികയാണെന്ന് ഡെപ്യൂട്ടി പോലീസ് കമ്മീഷണർ പ്രതീക് സിങ് പറഞ്ഞു.
വില്ലൻ കഥാപാത്രങ്ങളിലൂടെ ശ്രദ്ധേയനായിരുന്നു റായിമോഹൻ. നൂറിലേറെ ഒഡിയ ചിത്രങ്ങളിലും 15 ബംഗാളി ചിത്രങ്ങളിലും വേഷമിട്ടു. തിയേറ്റർ കലാകാരൻ കൂടിയായിരുന്നു.
ഒഡിഷയിലെ ക്യോഞ്ഝാർ സ്വദേശിയാണ് റായിമോഹൻ. രാമ ലക്ഷ്മൺ, നാഗ പഞ്ചമി, രണ ഭൂമി, സിംഘ ബാഹിനി, ആസിബു കെബേ സാജി മോ റാണി, ഉഡാന്തി സീത തുടങ്ങിയവയാണ് പ്രധാനചിത്രങ്ങൾ. ഭാര്യയും രണ്ട് മക്കളുമുണ്ട്.