എന്താണ് ബിഎൽഡിസി ഫാൻ? എന്തുകൊണ്ട് ഇത്തരം ഫാനുകൾ ഉപയോഗിക്കണം

⭕️ചൂടേറെയുള്ള കേരളത്തിലെ സാഹചര്യത്തിൽ ഒരു പക്ഷെ നമ്മുടെ വീടുകളിൽ 24 മണിക്കൂറും പ്രവർത്തിക്കുന്ന ഒരു വൈദ്യുത ഉപകരണമായിരിക്കും ഫാനുകൾ. ചൂടിനെ പ്രതിരോധിക്കാൻ എസിയും കൂളറുമൊക്കെയുണ്ട് എങ്കിലും സാധാരണക്കാരന് വാങ്ങാൻ പറ്റുന്നത് ഫാൻ തന്നെയാണ്. അതെ സമയം ഫാനുകളെപ്പറ്റിയും ഫാനിന്റെ വൈദ്യുത ഉപയോഗത്തെപ്പറ്റിയും നമ്മൾ ബോധമന്മാരാണോ? ഫാൻ പൊതുവിൽ കുറച്ച് വൈദ്യുതി മാത്രം ഉപയോഗിക്കുന്ന ഒരു വൈദ്യുത ഉപകരണമാണ് എന്ന നമ്മുടെ ചിന്ത ശരിയാണോ? വിപണിയിൽ അടുത്തെത്തിയ ബിഎൽഡിസി ഫാനുകൾ എന്താണ് എന്നതിനെപ്പറ്റി എന്തെങ്കിലും ധാരണയുണ്ടോ?
സാധാരണ ഫാനുകൾക്ക് ഇപ്പോൾ എന്താണ് പ്രശ്നം?

⭕️സ്വാഭാവികമായും ഈ ചോദ്യമാണ് നിങ്ങളുടെ മനസ്സിൽ ആദ്യമെത്തുക. സാധാരണ ഫാനുകളിൽ ഉപയോഗിക്കുന്നത് സിംഗിൾ ഫേസ് ഇൻഡക്ഷൻ മോട്ടറാണ്. ഡിസൈൻ ചെലവും നിർമ്മാണച്ചെലവും വളരെ കുറഞ്ഞ ഇത്തരം ഫാനുകൾ വർഷങ്ങളായി വിപണിയിലുള്ളതും മികച്ച ഡിസൈൻ, മെറ്റീരിയലുകൾ, നിർമ്മാണരീതികൾ, ഊർജ്ജക്ഷമത എന്നീ കാര്യത്തിൽ അതിന്റെ പാരമ്യത്തിൽ എത്തിക്കഴിഞ്ഞു. ഇനിയും മെച്ചപ്പെട്ട ഊർജ്ജക്ഷമത ഇത്തരം ഫാനിൽ നിന്നും നേടാനാവില്ല.

⭕️ഇൻഡക്ഷൻ മോട്ടോറുകളുടെ ഏറ്റവും വലിയ പരിമിതി, ഒരു നിശ്ചിത വോൾട്ടേജിലും ആവൃത്തിയിലും അവയുടെ വേഗം പൂജ്യം മുതൽ മാക്സിമം വരെ നമുക്ക് അഡ്ജസ്റ്റ് ചെയ്യാൻ ആവില്ല എന്നതാണ്. അതായത് നാം സാധാരണ ഉപയോഗിക്കുന്ന സീലിംഗ് ഫാനുകളുടെ സ്പീഡ് 50 അർപിഎം മുതൽ 350 അർപിഎം വരെ (നാലോ അഞ്ചോ സെറ്റിംഗുകളിൽ) ആവാം. ഈ സ്പീഡ് നിയന്ത്രിക്കുന്നതിന് നാം ഒരു റെഗുലേറ്റർ ആണ് ഉപയോഗിക്കുന്നത്. ഫലത്തിൽ സ്പീഡ് ക്രമീകരിക്കാൻ ഫാനിലേക്കുള്ള വോൾട്ടേജിനെ മാത്രമാണ് തടഞ്ഞു നിർത്തുന്നത്. ആകെ ഊർജ്ജത്തിൽ ഒരു നല്ല ഭാഗം റെഗുലേറ്ററിൽ തന്നെ നഷ്ടപ്പെട്ടുപോവുന്നു. (അതും ചൂട് ആയിത്തന്നെ!).
കഴിഞ്ഞില്ല പ്രശ്നങ്ങൾ

⭕️ഇതിനു പുറമേ ഒരു ഫാൻ സ്വിച്ച് ഓൺ ചെയ്യുമ്പോൾ ഓടിത്തുടങ്ങാനായി ഒരു സ്റ്റാർട്ടിങ്ങ് കോയിൽ ആവശ്യമുണ്ട്. ഇതിന്റെ ഭാഗമായി ഒരു കപ്പാസിറ്ററും ഉണ്ടാകും. മിക്ക ഫാനുകളിലും ഓടിക്കൊണ്ടിരിക്കുമ്പോഴും ഈ കപ്പാസിറ്റർ – കോയിൽ സർക്യൂട്ടിലൂടെയും വൈദ്യുതി ഒഴുകിക്കൊണ്ടിരിക്കും. ഏറ്റവും നല്ല നല്ല രീതിയിൽ ഊർജംവിനിയോഗത്തിന് യോജിച്ചതല്ല ഇത്തരം സർക്യൂട്ടുകൾ. പുതുതായി ഘടിപ്പിച്ച ഒരു ഫാൻ തുടക്കത്തിൽ ഏകദേശം 80 വാട്ട് പവർ ചെലവാക്കുമെങ്കിലും പഴക്കം ചെല്ലുമ്പോൾ കപ്പാസിറ്റർ, വൈൻഡിങ്ങ് തുടങ്ങിയവയിൽ ഉണ്ടാകുന്ന വിവിധപ്രശ്നങ്ങൾ മൂലം കൂടുതൽ വൈദ്യുതി ഉപയോഗിക്കും. ഇത് മൂലം വൈൻഡിങ്ങുകൾ ചൂടാവുകയും ഫാനിന്റെ യഥാർത്ഥവേഗം കുറയുകയും ഒച്ച കൂടുകയും മറ്റും ചെയ്യും.

⭕️എന്നാൽ ഇൻഡക്ഷൻ മോട്ടോറുകൾക്ക് പകരം നവീനരീതിയിലുള്ള മോട്ടോറുകൾ ഉപയോഗിച്ചാൽ, ആധുനികമായ ഇലക്ട്രോണിക് ഘടകങ്ങൾ വഴി നമുക്ക് വോൾട്ടേജിന് പുറമേ ഫ്രീക്വൻസിയും ക്രമീകരിക്കാം. ബിഎൽഡിസി ഫാനുകളിലെ മുഖ്യമായ ഒരു ഘടകം ഇത്തരം ഒരു വേരിയബിൾ ഫ്രീക്വൻസി ഡ്രൈവ് സർക്യൂട്ടാണ്. ആവശ്യമുള്ള വേഗം എത്രയോ അതിന് ആനുപാതികമായ ഫ്രീക്വൻസിയും വോൾട്ടേജുമുള്ള കൃത്രിമ ത്രീ-ഫേസ് പോലെ കണക്കാക്കാവുന്ന ഒരു DC മോട്ടോർ ആണു് ബിഎൽഡിസി മോട്ടോർ.

⭕️പേരിലെ ബിഎൽ എന്നാൽ ബ്രഷ്‌ലെസ്സ്. സാധാരണ ഡിസി മോട്ടോറുകളിൽ കറങ്ങിക്കൊണ്ടിരിക്കുന്ന ഭാഗത്തിനും ഒരു വൈൻഡിങ്ങ് ആവശ്യമുണ്ട്. അതിലേക്ക് വൈദ്യുതി പ്രവഹിപ്പിക്കാൻ ഒരു ബ്രഷ് കോണ്ടാക്റ്റും വേണ്ടിവരും. എന്നാൽ സങ്കീർണ്ണവും തേയ്മാനസാദ്ധ്യതയുമുള്ള ഇത്തരം ബ്രഷ് കോണ്ടാക്റ്റുകൾക്ക് പകരം ബ്രഷ്‌ലെസ്സ് ഡിസി മോട്ടോറുകളിൽ, അകത്ത് കറങ്ങുന്ന ഭാഗത്ത് (റോട്ടോർ) സ്ഥിരകാന്തങ്ങളാണ് ഉപയോഗിക്കുന്നത്. ഈ വ്യത്യാസങ്ങൾ മൂലം BLDC മോട്ടോറിന് നിർമ്മാണച്ചെലവും വിലയും കൂടുതലായിരിക്കും.

🔘വില കൂടുതൽ, പിന്നെന്തിന് ബിഎൽഡിസി ഫാൻ വാങ്ങണം?

⭕️ബിഎൽഡിസി മോട്ടോർ ഉപയോഗിക്കുന്ന ഫാനുകളിൽ പഴയ തരം ഫാനുകളേക്കാൾ വളരെക്കുറച്ച് ഊർജ്ജം മതി. ഏറ്റവും കുറഞ്ഞ സ്പീഡിൽ അത് പത്തിലൊന്നുവരെ കുറയാം. (അതായത് 50 വാട്ടിനുപകരം 5 വാട്ട്). ലളിതമായി പറഞ്ഞാൽ, ദിവസേന 12 മണിക്കൂർ മിനിമം സ്പീഡിൽ ഉപയോഗിക്കുന്ന ഒരു സാധാരണ ഫാനിന് പകരം ബിഎൽഡിസി ഫാൻ വെയ്ക്കുകയാണെങ്കിൽ ഏറ്റവും കുറഞ്ഞത് 0.6 യൂണിറ്റിന് പകരം 0.06 യൂണിറ്റ് മതി. അഥവാ, സാധാരണ ഫാന് പ്രവർത്തിക്കാൻ ഒരു ദിവസം വേണ്ടിവരുന്ന വൈദ്യുതികൊണ്ട് ബിഎൽഡിസി ഫാൻ 10 ദിവസം പ്രവർത്തിപ്പിക്കാം.

⭕️നമ്മുടെ മൊത്തം വൈദ്യുതി ഉപഭോഗത്തിന്റെ അളവനുസരിച്ച് യൂണിറ്റിന് ശരാശരി 5 മുതൽ 9 വരെ രൂപ വില കണക്കാക്കിയാൽ, ഫാനിന്റെ പഴക്കം മൂലം ദിവസേന ഒരു യൂണിറ്റു വരെ ചെലവാക്കുന്നു എന്നാണ് പഠനം. അതെ സമയം ഈ വെദ്യുതി നഷ്ടം വരുത്താത്ത ബിഎൽഡിസി വാങ്ങി ഉപയോഗിച്ചാൽ എങ്കിൽ ഏകദേശം ഒരു വർഷം കൊണ്ട് ഫാനിന്റെ വില വസൂൽ ആവും.

⭕️ബിഎൽഡിസി ഫാനുകൾക്ക് മറ്റൊരു മെച്ചം കൂടിയുണ്ട്. സാധരണ ഫാനുകളുടെ സഹചാരിയായ റെഗുലേറ്ററുകൾ ആവശ്യമില്ല. ഫാനിനേക്കാൾ കൂടുതൽ കേടുവരുന്നതും ചെലവു വരുന്നതും റെഗുലേറ്ററുകൾക്കാണ്. പകരം വളരെ സൗകര്യപ്രദമായ ഒരു റിമോട്ട് കണ്ട്രോൾ ഉണ്ടായിരിക്കും. ഏറ്റവും പുതിയ, അഥവാ ഇനിയും വരാനിരിക്കുന്ന, സ്മാർട്ട് മോഡലുകളിൽ വോയ്സ് കമാൻഡുകൾ സവിധാനവുമെത്തും. അല്പം ഹൈടെക് ആവാമെന്നേ.

🔘ഇപ്പോൾ ഉപയോഗിക്കുന്ന ഫാൻ എന്ത് ചെയ്യും?

⭕️ഇപ്പോൾ ഒരു വിധം കുഴപ്പമില്ലാതെ ഓടിക്കൊണ്ടിരിക്കുന്ന ഇൻഡക്ഷൻ മോട്ടോർ ഫാൻ എന്തു ചെയ്യും? എന്നതാവും ഇപ്പോൾ മനസ്സിലുള്ള സംശയം. വെറുതെ വലിച്ചെറിഞ്ഞുകളയണ്ട. വല്ലപ്പോഴും മാത്രം ഒന്നോ രണ്ടോ മണിക്കൂർ ഉപയോഗിക്കുന്ന മുറികളിലോ വരാന്തയിലോ മറ്റോ അവ മാറ്റി സ്ഥാപിക്കാം. വൈൻഡിങ്ങ് കത്തിപ്പോയോ മറ്റോ തീരെ ഉപയോഗശൂന്യമാവുന്ന കാലം വരെ അവയുടെ ഉപയോഗം തുടരാം.