മെഡിക്കല്‍ പ്രവേശനപരീക്ഷയായ നീറ്റില്‍ തോറ്റതിന്‍റെ മനോദുഃഖത്തില്‍ തമിഴ്നാട്ടില്‍ വിദ്യാർഥിനി ആത്മഹത്യ ചെയ്തു. നീലഗിരി ജില്ലയിലാണ് സംഭവം. 12ാം ക്ലാസ് പരീക്ഷക്ക് ശേഷം 17കാരി സെപ്റ്റംബറില്‍ നീറ്റ് പരീക്ഷ എഴുതി. എന്നാല്‍ നീറ്റില്‍ വിജയിക്കാന്‍ കഴിയാതെ വന്നതോടെ പെണ്‍കുട്ടി വിഷാദരോഗത്തിന് അടിമയായെന്നാണ് റിപ്പോര്‍ട്ട്.
പെണ്‍കുട്ടിയുടെ വിഷമം മനസിലാക്കിയ മാതാപിതാക്കള്‍ തിരുപ്പൂര്‍ ജില്ലയിലെ ബന്ധുക്കളുടെ വീട്ടിലേക്ക് അയച്ചു. എന്നാല്‍ ദീപാവലിക്ക് കുട്ടി വീട്ടില്‍ തിരിച്ചെത്തി. ഡിസംബര്‍ 18ന് പെണ്‍കുട്ടി കുറിപ്പ് എഴുതിവെച്ചശേഷം ജീവനൊടുക്കുകയായിരുന്നു. മേട്ടുപാളയത്തിലെ സ്വകാര്യ ആശുപത്രിയില്‍ ചികിത്സയിലായിരുന്ന വിദ്യാര്‍ഥിനി 23ന് മരിച്ചു. സന്തോഷവതിയാണെന്ന് അഭിനയിക്കാന്‍ കഴിയില്ലെന്നും മാതാപിതാക്കള്‍ ക്ഷമിക്കണമെന്നും പെണ്‍കുട്ടിയുടെ ആത്മഹത്യക്കുറിപ്പില്‍ ചൂണ്ടിക്കാട്ടുന്നു.