സമരം കൂടുതൽ ശക്തമാക്കാനൊരുങ്ങി കർഷകർ. കർഷക സമരം ഒരു വർഷം തികയുന്ന 26ന് രാജ്യവ്യാപകമായി പ്രതിഷേധം സംഘടിപ്പിക്കുമെന്ന് സംയുക്ത കിസാൻ മോർച്ച. ശീതകാല പാർലമെന്റ് നടക്കുന്ന വേളയിൽ എല്ലാ ദിവസവും 500 കർഷകർ പാർലമെന്റിലേക്ക് മാർച്ച്‌ നടത്തുമെന്നും കർഷക നേതാക്കൾ അറിയിച്ചു. വരും ദിവസങ്ങളിൽ വിവിധ സംസ്ഥാനങ്ങളിലായി മഹാപഞ്ചായത്ത് ചേരുമെന്നും കർഷക നേതാക്കൾ വ്യക്തമാക്കി.
ദില്ലി അതിർത്തികൾ കേന്ദ്രീകരിച്ചുള്ള കർഷക സമരം ഒരു വർഷത്തോട് അടുക്കുമ്പോൾ സമരം കൂടുതൽ ശക്തമാക്കാനൊരുങ്ങി കർഷക സംഘടനകൾ. കർഷക സമരം ഒരു വർഷം തികയുന്ന നവംബർ 26 ന് രാജ്യവ്യാപകമായി കർഷക സമരം നടത്തുമെന്ന് സംയുക്ത കിസാൻ മോർച്ച വ്യക്തമാക്കി.
സംസ്ഥാന തലത്തിൽ കർഷക സംഘടനകൾ സമരങ്ങൾ സംഘടിപ്പിക്കുന്നത് കൂടാതെ ദില്ലി അതിർത്തികളിലെ സമര കേന്ദ്രങ്ങളിൽ വലിയ പ്രതിഷേധ പ്രകടനങ്ങളും നടത്തും. സമരത്തിൽ രാജ്യത്തെ തൊഴിലാളികളും വിദ്യാർഥികളും സ്ത്രീകളും കർഷകരോടൊപ്പം അണിനിരക്കണമെന്ന് സംയുക്ത കിസാൻ മോർച്ച അഭ്യർത്ഥിച്ചു.
കാർഷിക കരി നിയമം പിൻവലിക്കാതെ പുറകോട്ടില്ലെന്ന് ആവർത്തിച്ച് കൊണ്ടാണ് കർഷകർ സമരം ശക്തമാക്കുന്നത്. നവംബർ 28 ന് മുംബൈ നഗരത്തിലെ ആസാദ് മൈതാനിൽ കർഷകർ മഹാപഞ്ചായത്ത് ചേരും. നവംബർ 29 മുതൽ ആരംഭിക്കുന്ന ശീതകാല പാർലമെന്റ് സമ്മേളന വേളയിൽ ദില്ലി അതിർത്തിയിൽ നിന്നും 500 കർഷകർ ദിവസവും പാർലമെന്റിലേക്ക് മാർച്ച്‌ നടത്തുമെന്നും കർഷക നേതാക്കൾ അറിയിച്ചു.