ഉത്തർപ്രദേശിൽ പനിബാധിച്ച ബാലൻ ചികിത്സ കിട്ടാതെ മരിച്ചു. കർബല സ്വദേശി രാജ്‌കുമാറിന്റെ മകൻ ഹൃതിക്കാണ് ചികിത്സ കിട്ടാതെ മരിച്ചത്. കടുത്ത പനിയെതുടർന്ന്‌ ഫിറോസാബാദ് മെഡിക്കല്‍ കോളജില്‍ എത്തിച്ച ഹൃതിക്കിന് അഞ്ച് മണിക്കൂറോളം കാത്തുനിന്നിട്ടും പ്രവേശനം ലഭിച്ചില്ല. ആശുപത്രിയിലെ കിടക്കകളുടെ അപര്യാപ്തയാണ് ഹൃത്വിക്കിന് പ്രവേശനം നിഷേധിക്കുന്നതിലേക്ക് നയിച്ചതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തു. ഹൃത്വിക്കിന്‍റെ മൃതദേഹവുമായി അച്ഛൻ രാജ്കുമാര്‍ നടന്നു പോകുന്ന ചിത്രം സമൂഹമാധ്യമങ്ങളിൽ വൈറലാണ്.
കുട്ടിയെ വീടിന് സമീപത്തെ സ്വകാര്യ ക്ലിനിക്കിലാണ് ആദ്യം എത്തിച്ചതെന്ന് രാജ്കുമാര്‍ പറഞ്ഞു. എന്നാല്‍, 40,000 രൂപ കെട്ടിവെക്കാതെ ചികിത്സ നടത്താൻ കഴിയില്ലെന്ന് ആശുപത്രി അധികൃതർ പറഞ്ഞു. ഇതോടെയാണ് ഫിറോസാബാദ് മെഡിക്കല്‍ കോളേജിലേക്ക് പോയത്. കുട്ടിയെ മെഡിക്കല്‍ കോളജിലെത്തിച്ച്‌ അഞ്ച് മണിക്കൂറിലേറെ കാത്തുനിന്നെങ്കിലും ബെഡ് ലഭിച്ചില്ലെന്നും രാജ്കുമാര്‍ പറഞ്ഞു.