പടി‌‍ഞ്ഞാറൻ ഇറാഖിൽ അമേരിക്കയുടെ വ്യോമകേന്ദ്രത്തിൽ റോക്കറ്റാക്രമണം. അൻബർ പ്രവിശ്യയിലെ അയിൻ അൽഅസദ് വ്യോമകേന്ദ്രത്തിൽ പത്ത് റോക്കറ്റെങ്കിലും പതിച്ചെന്ന് സഖ്യസേനാ വക്താവ് കേണൽ വെയ്ൻ മാരോറ്റോ അറിയിച്ചു.
അൻബറിലെ അൽബാഗ്ദാദി മേഖലയിൽനിന്നാണ് റോക്കറ്റ് തൊടുത്തുവിട്ടതെന്നും നാശനഷ്ടമില്ലെന്നും ഇറാഖ്‌ പൊലീസ് അറിയിച്ചു. സഖ്യകക്ഷികളുമായി ചർച്ച ചെയ്തശേഷം ശക്തമായ തിരിച്ചടിയുണ്ടാകുമെന്ന് അമേരിക്ക പ്രതികരിച്ചു.
മാർപാപ്പ ശനിയാഴ്‌ച ഇറാഖ്‌ സന്ദർശിക്കാനിരിക്കെയാണ് ആക്രമണം.അമേരിക്ക കഴിഞ്ഞവർഷം ഇറാൻ ജനറൽ ഖാസിം സുലൈമാനിയെ ബാഗ്ദാദ് വിമാനത്താവളത്തിനു പുറത്തുവച്ച് ഡ്രോൺ ആക്രമണത്തിൽ വധിച്ചതിന് തിരിച്ചടിയായി ഇറാൻ അയിൻ അൽഅസദ് വ്യോമകേന്ദ്രത്തിൽ മിസൈൽ വർഷം നടത്തിയിരുന്നു. പശ്ചിമേഷ്യ വീണ്ടും സംഘര്ഷത്തിലേയ്ക്ക് നീങ്ങാൻ ഇത് കാരണമാകുമെന്നാണ് വിലയിരുത്തൽ.