ബിഗ് ബോസ് വീട്ടിൽ (Bigg Boss Malayalam) നിന്നും ഷിജുവിനു പിന്നാലെ ശോഭയും പുറത്തേക്ക്. ഇനി മൂന്നു പേർ മാത്രമാണ് ശേഷിക്കുന്നത്. അഖിൽ മാരാർ, റെനീഷ റെഹ്‍മാൻ, ജുനൈസ് വി പി എന്നിവരാണ് അവസാന മൂന്ന് മത്സരാർത്ഥികൾ.
തുടക്കം മുതലേ ശോഭ ബിഗ് ബോസ് ഹൗസിൽ മികച്ച പോരാട്ടം കാഴ്ചവെച്ചിരുന്നു. ‘നെവര്‍ ഗിവപ്പ്’ എന്നായിരുന്നു ശോഭയുടെ നിലപാട്. രണ്ട് തവണ ശോഭ ക്യാപ്റ്റനായിരുന്നു. ഒന്നും വിട്ടുകൊടുക്കാൻ തയ്യാറാകുന്ന പ്രകൃതമല്ല ശോഭയുടേത്. പലപ്പോഴും പരാജയം സമ്മതിക്കാതിരുന്ന ശോഭ വിമർശനം ഏറ്റുവാങ്ങിയിരുന്നു.
ബിഗ് ബോസ് മലയാളം സീസൺ 5 ഗ്രാൻഡ് ഫിനാലെയിലെ ആദ്യ എവിക്ഷനിൽ ഷിജുവാണ് പുറത്തായത്. ഇക്കുറി അവസാന അഞ്ചു പേരിൽ ഇടം പിടിച്ചത് അഖിൽ മാരാർ, ശോഭ വിശ്വനാഥ്, റെനീഷ റെഹ്‍മാൻ, ജുനൈസ് വി പി, ഷിജു എന്നിവരായിരുന്നു. ഹാളിലെ സോഫയിൽ ഇരിക്കവെ ഷിജുവിനോട് ബിഗ് ബോസ് കൺഫെഷൻ റൂമിലേക്ക് വിളിപ്പിച്ചു. അവിടെ എത്തിയ ഷിജുവിനോട് ബിഗ് ബോസ് ഷോയിൽ നിന്നും പുറത്തായിരിക്കുകയാണെന്ന് ബിഗ് ബോസ് അറിയിച്ചു. തുടർന്ന് ബ്ലൈൻഡ് ഫോൾഡ് ധരിച്ച ഷിജുവിനെ കണ്‍ഫെഷന്‍ റൂമില്‍ നിന്ന് ഫിനാലെ വേദിയിലേക്ക് എത്തിക്കുകയായിരുന്നു.
സീസൺ അഞ്ചിലെ ഏറ്റവും പരിചിത മുഖങ്ങളിൽ ഒരാളായിരുന്നു ഷിജു. ഈ സീസണിൽ അഖിൽ മാരാരും ഷിജുവും തമ്മിലുള്ള സൗഹൃദം ഏറെ ശ്രദ്ധിക്കപ്പെട്ടിരുന്നു. മലയാളം, തെലുങ്ക് ഭാഷകളിലായി 160 ൽ അധികം സിനിമകളിൽ ഷിജു അഭിനയിച്ചിട്ടുണ്ട്.