നിയമസഭാ തെരഞ്ഞെടുപ്പ് മുന്നിൽകണ്ട് ഉത്തര്‍പ്രദേശില്‍ മന്ത്രിസഭ വികസനത്തനൊരുങ്ങി യോഗി ആദിത്യനാഥ്. പുതിയ മന്ത്രിമാർ ഞായറാഴ്ച വൈകിട്ട് സത്യപ്രതിജ്ഞ ചെയ്യുമെന്നാണ് റിപ്പോര്‍ട്ടുകള്‍. ഇതിന്‍റെ ഭാഗമായി ഗവര്‍ണര്‍ ആനന്ദിബെന്‍ പട്ടേൽ ലഖ്നോവില്‍ എത്തുന്നുണ്ട്. ഏഴ് പുതുമുഖങ്ങളെ ഉൾപ്പെടുത്തിയാണ് മന്ത്രിസഭ വികസിപ്പിക്കുന്നത്.
അടുത്തിടെ ബിജെപിയിൽ ചേർന്ന മുൻ കോൺഗ്രസ് നേതാവും രാഹുൽഗാന്ധിയുടെ വിശ്വസ്തനുമായിരുന്ന ജിതിൻ പ്രസാദ, സംഗീത ബിന്ദ്, ഛത്രപാല്‍ ഗംഗ്വാര്‍, പാല്‍തുറാം, ദിനേഷ് ഖാതിക്, കൃഷ്ണ പാസ്വാന്‍ എന്നിവര്‍ മന്ത്രിമാരായി സത്യപ്രതിജ്ഞ ചെയ്തേക്കും. ജിതിൻ പ്രസാദയെ തിടുക്കം പിടിച്ച് മന്ത്രിയാക്കുന്നത് ബ്രാഹ്മണ വോട്ട് ബാങ്ക് മുന്നിൽകണ്ടാണ്. അതിനിടെ, നിഷാദ് പാര്‍ട്ടി നേതാവ് സഞ്ജയ് നിഷാദിനെ മന്ത്രിയാക്കിയേക്കുമെന്ന് അഭ്യൂഹമുണ്ട്. കേന്ദ്രമന്ത്രിസഭ പുന:സംഘടനയില്‍ മകന്‍ പ്രവീണ്‍ നിഷാദിനെ ഉൾപ്പെടുത്തതിൽ സഞ്ജയ് അതൃപ്തി പരസ്യമാക്കിയിരുന്നു.
അടുത്തവർഷം നടക്കാനിരിക്കുന്ന നിയമസഭ തെരഞ്ഞെടുപ്പ് ബിജെപിയെ സംബന്ധിച്ച് ഏറെ നിർണായകമാണ്. അതിന്റെ ഭാഗമായാണ് യോഗിയുടെ പുതിയ നീക്കം. അസംതൃപ്തരായ മതവിഭാഗങ്ങളെ ഒപ്പം നിർത്താൻ വേണ്ടിയാണ് പ്രാതിനിധ്യം ലഭിക്കാത്ത ജാതിക്കാരെയും പാര്‍ട്ടികളെയുമാണ് മന്ത്രിസഭ പുന:സംഘടനയില്‍ ഉൾപ്പെടുത്തുന്നത്.