കോവിഡ്​ രോഗിയെ രക്ഷിച്ചതിന്​ പരിഹാസം: ശ്രീജിത്ത്​ പണിക്കർക്കെതിരെ വ്യാപക പ്രതിഷേധം

0
29

 

കോവിഡ്​ രോഗിയെ ബൈക്കിൽ ആശുപത്രിയിൽ എത്തിച്ച്‌​ ജീവൻ രക്ഷിച്ചതിനെ പരിഹസിച്ച തീവ്ര സംഘപരിവാർ പ്രചാരകൻ ശ്രീജിത്ത്​​ പണിക്കർക്കെതിരെ സമൂഹമാധ്യമങ്ങളിൽ പ്രതിഷേധം വ്യാപകം. രോഗിയെ രക്ഷിച്ച പ്രവൃത്തിയെ രണ്ട്​ ബ്രഡുകൾക്കിടയിൽ ജാം തേക്കുന്നതിനോട് ഉപമിക്കുകയും ബലാത്സംഗ പരാമർശം നടത്തുകയുമായിരുന്നു ഇയാൾ.

ഇത്തരം വികൃത മനസ്സുള്ളവരെ ചാനൽചർച്ചകളിൽ പ​ങ്കെടുപ്പിക്കരുതെന്ന്​ നിരവധിപേർ ആവശ്യമുന്നയിച്ചു. ശ്രീജിത്തിൻറെ പോസ്റ്റിന്​ കീഴിലും മാധ്യമങ്ങളിൽ ഇതുസംബന്ധിച്ച വാർത്തകൾക്ക്​ കീഴിലും രൂക്ഷ വിമർശനമാണ്​ ഉയരുന്നത്​. അത്യന്തം വിദ്വേഷം വമിക്കുന്ന സംഘ്​പരിവാർ പ്രചാരകനാണ്​ ഇയാളെന്നും ചാനൽ ചർച്ചകളിൽ ഇടം കൊടുക്കരുതെന്നും ഭൂരിഭാഗം പേരും അഭിപ്രായപ്പെട്ടു.

ഇയാൾ പങ്കെടുക്കുന്ന ചാനൽ ചർച്ചയിൽ പങ്കെടുക്കില്ലെന്ന് ഇടത് നിരീക്ഷകൻ ഡോ . പ്രേംകുമാർ വ്യക്​തമാക്കി. സഹജീവിയെ മരണത്തിൽ നിന്നെടുത്തു കുതിക്കുന്ന മനുഷ്യരെ കാണുമ്ബോൾ റേപ്പിൻറെ സാധ്യതകൾ നിരീക്ഷിക്കുന്നയാളോട് സംവദിക്കാൻ തന്നെകൊണ്ടാവില്ലെന്നും പ്രേംകുമാർ പറഞ്ഞു. ശ്രീജിത്ത് പണിക്കർ ഉള്ളൊരു പാനലിലും താനുണ്ടാവില്ലെന്നും ഇതിൽ കൂടുതലൊന്നും പറയാനില്ലെന്നും അദ്ദേഹം അറിയിച്ചു.

കേരളത്തോട്, മുസ്​ലിംകളോട്, ഇവിടത്തെ സാദാ മനുഷ്യരോട്, സംഘിയില്ലാത്ത സകലതിനോടുമുള്ള അകം തുളച്ചു പുറത്തു ചാടുന്ന അതി തീവ്രമായ വെറുപ്പാണ്​ ശ്രീജിത്തിൻറെ ആകെയുള്ള ബൗദ്ധിക ഇന്ധനമെന്ന്​ ആർ ജെ. സലീം ചൂണ്ടിക്കാട്ടി. ‘എന്തിലേക്കും ഏതിലേക്കും കൊണ്ട് വരുന്ന അറപ്പുളവാക്കുന്ന ലൈംഗിക വൈകൃത പരാമർശങ്ങൾ. ഒരാളുടെ അത്യാസന്ന നിലയിൽ പോലും അതിനോട് ചേർത്ത് റേപ്പ് ജോക് അടിക്കുന്ന വെറും മൂന്നാംകിട സൈക്കോ.

അയാളെ ഇനിയും ചാനലുകളിൽ കൊണ്ടിരുത്തി ഈ സമൂഹത്തിലേക്ക് ക്യാൻസർ കടത്തി വിടരുതെന്നും സലിം കുറിച്ചു. മാധ്യമപ്രവർത്തകരായ കെ.എ ഷാജി, കെ.ജെ ജേക്കബ് തുടങ്ങിയവരും ശ്രീജിത്ത് പണിക്കർക്കെതിരെ രംഗത്തെത്തി. ഇതിനുപുറമെ പതിനായിരങ്ങളാണ് ഇയാൾക്കെതിരെ കടുത്ത പ്രതിഷേധവുമായി രംഗത്തുവന്നത്.