Home Kerala മതങ്ങൾ തമ്മിൽ മൽസരിക്കുന്ന മണ്ണാണ് വലതിന് വേണ്ടത്, മനുഷ്യരെക്കൊണ്ട് മതം പറയിപ്പിക്കുന്ന നിമിഷമാണവരുടെ വിന്നിംഗ് മൊമന്റ്....

മതങ്ങൾ തമ്മിൽ മൽസരിക്കുന്ന മണ്ണാണ് വലതിന് വേണ്ടത്, മനുഷ്യരെക്കൊണ്ട് മതം പറയിപ്പിക്കുന്ന നിമിഷമാണവരുടെ വിന്നിംഗ് മൊമന്റ്. അസീബ് പുത്തലത്ത് എഴുതുന്നു.

SHARE

കേരളത്തിൽ ആസൂത്രിതമായ മത ധ്രുവീകരണത്തിന് വലത് പക്ഷം തയ്യാറായി കഴിഞ്ഞു. ഒളിച്ചും പാത്തും നടത്തിക്കൊണ്ടിരുന്ന വർഗീയ വിഷപ്രചാരണത്തിന് ഇപ്പോൾ മദ്ധ്യം സ്പോന്സര്ഷിപ്പും ലഭിക്കുകയാണ്. ഈ സാഹചര്യത്തെ വിലയിരുത്തി അസീബ് പുത്തലത്ത് എഴുതുന്നു..
പോസ്റ്റിന്റെ പൂർണ രൂപം

  1. സംഘ്പരിവാറിന് ഈ നാട് ബാലികേറാമലയാവുന്നതിന്റെ ബേസിക്സ് കേരളത്തിന്റെ ഡെമോഗ്രഫിയാണെങ്കിൽ അത് കിട്ടാക്കനിയാവുന്നതിന്റെ പൊളിറ്റിക്സ് മാർക്സിസ്റ്റ് പാർട്ടിയാണ്. 55% ഭൂരിപക്ഷവും ആകെ 45% ന്യൂനപക്ഷ മതവിഭാഗങ്ങളുമുള്ളിവിടെ തീവ്രധ്രുവീകരണം വല്ലതും നടന്ന് കിട്ടാതെ ഭരണം പോയിട്ട് ഒറ്റക്കൊരു വലിയകക്ഷിയാവാൻ ബി ജെ പിക്ക് പറ്റില്ല. അങ്ങനൊന്ന് നടക്കണമെങ്കിൽ മാർക്സിസ്റ്റ് പാർട്ടി കല്ലിന്മേൽ കല്ലവശേഷിക്കാതെ നശിച്ച് പോണം.
  2. സംഘിന് ചൂണ്ടിക്കാണിച്ച് വളരാനുള്ള വിഭാഗം യുഡിഎഫിന് പിന്നിൽ നിൽക്കുകയും, മൊത്തമുള്ളതിന്റെ 35 ശതമാനം വോട്ടും, മനുഷ്യർ മതം മാത്രമായി മാറുന്നൊരു കാലത്ത് സംഘിന് കിട്ടിയേക്കാമെന്ന് കരുതുന്ന ഹിന്ദുവോട്ടിന്റെ ഭൂരിപക്ഷവും സി പി എമിന് പിന്നിലായിരിക്കുകയും ചെയ്യുന്നിടത്തോളം ആ പോളറൈസേഷൻ നടന്ന് ബി ജെ പി ജയിക്കില്ല, സി പി എം അതനുവദിക്കില്ല. ന്ന്വച്ചാ, ബി ജെ പി ഒരിക്കലും ജയിക്കാതിരിക്കുക എന്നതാണ് സി പി എമിന്റെ സ്വഭാവിക പ്രയോരിറ്റി.
  3. ധ്രുവീകരണം യുഡിഎഫിന്റേയും കൂടെക്കൂട്ടിയിട്ടുള്ള മതമൗലികവാദികളുടേയും കൂടെ ആവശ്യമാണ്. ബി ജെ പി ഭീഷണി വളരുകയും, അവരെ ആയുധം കൊണ്ടും ആശയം കൊണ്ടും എതിരിടുന്ന സി പി എം ഇല്ലാതാവുകയും ചെയ്യാതെ, കഴിഞ്ഞ ലോക്സഭയിൽ കണ്ടപോലെ ന്യൂനപക്ഷസമുദായം ഒന്നായി അവർക്ക് പിന്നിലേക്ക് ഷിഫ്റ്റ് ചെയ്യില്ല. പത്ത് പൈസയുടെ പൊളിറ്റിക്കൽ സെൻസുള്ളവർക്ക് തിരിയുന്ന ഇക്വേഷനാണത്. ന്ന്വച്ചാ, സ്വയം ജയിക്കാത്ത പക്ഷം സി പി എം തോൽക്കുക എന്നതാവും എപ്പോഴും ബി ജെ പിയുടേയും യു ഡി എഫിന്റേയും പ്രയോരിറ്റി.
  4. സി പി എമിന്റെ ഈ പ്രയോരിറ്റിയാണ്, നാല് കൊല്ലം മുന്നേ മഞ്ചേശ്വരത്തും വട്ടിയൂർക്കാവിലും വോട്ടെണ്ണിത്തീരുമ്പോ വീശാനിരുന്ന കാവിക്കൊടിയെ പെട്ടിയിലിരുത്തിയത്. യു ഡി എഫിന്റെ പ്രയോരിറ്റിയാണ് തൊട്ടപ്പുറത്തെ നേമത്ത് നിന്ന് കേരളാ നിയമസഭയിലാദ്യമായൊരു സംഘ്പരിവാറുകാരനെയെത്തിച്ചത്. ബി ജെ പിയുടെ പ്രയോരിറ്റിയാണ് അഴീക്കോടും ഹരിപ്പാടുമടക്കം ഒരുപാടിടങ്ങളിൽ കോൺഗ്രസിനെ ജയിപ്പിക്കുന്നത്. ഥവാ, കോലീബി എന്നത് വടകരയും ബേപ്പൂരും 91 ൽ മാത്രം കരാറൊപ്പിട്ടുണ്ടാക്കിയ സഖ്യം മാത്രമല്ല, വലതുപക്ഷത്തിന്റെ ഐഡിയോളജിക്കൽ പൊസിഷനാണ്.
  5. ആലിബാബ ഉമ്മൻ ചാണ്ടി മുതൽ നാൽപ്പത്തൊന്നാമത് നിന്ന പി കെ ജയലക്ഷ്മി വരെ നിരന്ന് നിന്ന് കട്ടയൊരു കാബിനറ്റ് കാലമായിരുന്നു യു ഡി എഫിന്റേത്. സരിതക്ക് പോയ കോളുകളുടെ എണ്ണം, അല്ലെങ്കിൽ പേരിലുള്ള വിജിലൻസ് കേസുകളുടെ എണ്ണം, രണ്ടാലൊന്നാലായിരുന്നു അന്നവരുടെ കാലിബർ അളന്നിരുന്നത്‌. PSC പരീക്ഷക്ക് പഠിക്കുന്നവർ വകുപ്പും മന്ത്രിമാരെയും ഓർത്തിരുന്നത് പേരിലുള്ള അഴിമതി മനപ്പാഠമാക്കിയായിരുന്നു.
  6. ലാഭമല്ലെന്ന് കണ്ട് സ്കൂളുകൾ പൂട്ടുന്ന, പൂട്ടാത്തിടത്ത് പുസ്തകം എത്താത്ത, ആശുപത്രിക്കിടക്കകളിൽ രോഗികൾ അട്ടിയിടുന്ന, പൊതുമേഖലാ സ്ഥാപനങ്ങൾ നഷ്ടത്തിലേക്ക് കൂപ്പ് കുത്തിയ, പൊതുവിതരണ സ്ഥാപനങ്ങൾ കാലിയായ, ഓണക്കിറ്റ് പോയിട്ട് ഓണച്ചന്ത പോലുമില്ലാത്ത, ക്ഷേമപെൻഷൻ ആർക്കുമെത്താത്ത, വൻവികസന പ്രവർത്തനങ്ങൾക്കായുള്ള ഭൂമിയേറ്റെടുക്കൽ മുടങ്ങിയ, പ്രത്യേകിച്ചൊരു പ്രകൃതിദുരന്തവിമില്ലാഞ്ഞിട്ടും പൊതുകടം രണ്ട് ഇരട്ടിയാക്കിത്തന്ന, സോഫ്റ്റ് പോൺ ഇൻഡസ്ട്രി ചരിത്രത്തിലേറ്റവും വെല്ലുവിളി നേരിട്ട ഉമ്മഞ്ചാണ്ടിക്കാലം.
  7. ആ കാലം കടന്നാണ് അധികാരത്തിലേറിയ സർക്കാരാണ്. പാർപ്പിടം, സ്കൂൾ, ആശുപത്രി, ക്ഷേമപെൻഷൻ, റേഷൻ മുതലങ്ങോട്ട് പവർഗ്രിഡ്, നാഷ്ണൽ ഹൈവേ, ഗെയിൽ വരെ, അടിസ്ഥാനവിഭാഗം മുതലങ്ങേ തലക്കൽ വരെയെത്തുന്ന മാറ്റമാണ്. നാലുകൊല്ലമായി ഇന്റർനാഷ്ണൽ മീഡിയകളിലാണ് കേരളം വാർത്തയായത്. തുടർച്ചയായുണ്ടായ പ്രകൃതിദുരന്തങ്ങൾ അതിജീവിച്ച് ഓരോ വകുപ്പുകളും ഫുൾ ഫ്ലഡ്ജഡായി വർക്കിംഗാണ്, ഭരണത്തുടർച്ചയുണ്ടാവുമെന്ന് തോന്നിപ്പിക്കും വിധം. അങ്ങനൊന്നുണ്ടായാലത് വലതുപക്ഷത്തിന്റെ ശവമടക്കിന് തുല്യമാണ്.
  8. നിലനിൽപ്പിനായുള്ള പോരാട്ടം, ആദ്യം പറഞ്ഞ ഐഡിയോളജിക്കൽ പൊസിഷന്റെ പിന്തുണ. ചാനലിലിരുന്ന് തെറി പറയാൻ, പരസ്പരം രക്ഷിച്ചും, തിരുമ്മിക്കൊടുത്തും സി പി എമ്മിന്റെ മെക്കിട്ട് കയറാൻ, കേന്ദ്രസർക്കാരിനോട് ചോദിക്കേണ്ട ചോദ്യങ്ങൾ കേരളസർക്കാരിനോട് ചോദിക്കാൻ, സംഘ്പരിവാർ നരേഷനുകൾ അതേപടിയേറ്റെടുത്ത് തെരുവിലിറങ്ങാൻ കോൺഗ്രസ്-ലീഗ്-സുഡാപ്പി-മൗദൂദികൾക്കുള്ള ഗ്ലൂക്കേസിതാണ്. രാജ്യമതിന്റേ ഏറ്റവും മോശം കാലഘട്ടത്തിൽ നിൽക്കുമ്പോ ഇടത്-സെക്യുലർ സ്പേസിവിടെ ശക്തമായാലൊരു പണിയും നടക്കില്ലെന്ന തിരിച്ചറിവ്.
  9. സർക്കാരിന്റെ ഭാഗമായി നിൽക്കുന്ന ഒരാളെയെങ്കിലും അറസ്റ്റ് ചെയ്യാൻ, മിനിമം ഒരു സി പി ഐ എം അണിയെയെങ്കിലും വിലങ്ങിടാൻ സ്വർണ്ണക്കടത്ത് കേസിൽ കേന്ദ്ര ഏജൻസികൾ തലകുത്തി നിന്ന് പണിയെടുത്തിട്ടും പറ്റീട്ടില്ല. അവസാനം, ഈത്തപ്പഴവും ഖുറാനും ഏറ്റ് വാങ്ങിയതിന് സംസ്ഥാനസർക്കാരിനെതിരെ കസ്റ്റംസ് വക കേസെടുക്കുന്നതിലേക്ക് വരെ ചുരുങ്ങീട്ടുണ്ട്. പണി നടക്കുന്നത് പക്ഷേ, നാട്ടിലെ വാട്സാപ്പ് ഗ്രൂപ്പുകളിലാണ്.
  10. ഹിന്ദുഭൂരിപക്ഷയിടങ്ങളിൽ ഇത് കൃത്യമായും ലക്ഷ്യം വക്കുന്നത് സി പി ഐ എം വോട്ടുകളെയാണ്. അതൊന്ന് പൊടിഞ്ഞ് കിട്ടീട്ട് വേണം ബി ജെ പിക്ക് സ്വന്തം കോലം വരക്കാൻ. സ്വന്തം കുടുംബത്തിലേക്ക് ഒരു മുസ്ലിം നാമധാരിയെ മകനാക്കിയ പിണറായി വിജയന്റെ കീഴിലെ ഏതേലും പോലീസ് സ്റ്റേഷനിൽ ഒരു പോലീസുകാരൻ വിളക്ക് കത്തിച്ചാൽ അങ്ങേരെ ഇസ്ലാമോഫോബിക് ആക്കുന്ന മുസ്ലിം വാട്സപ്പ് യൂണിവേഴ്സിലും ഇതിന്റെയവസാനം പാർട്ടിക്ക് നഷ്ടമായിരിക്കും.
  11. കേരളത്തിന് ഒരിടത് മനസുണ്ടെന്ന് വല്ലവനും പറഞ്ഞാൽ ചിരിക്കാതെ തരമില്ല. സി പി ഐ എം സംഘടനാ സംവിധാനം പട്ടിപ്പണിയെടുത്തുണ്ടാക്കുന്ന വോട്ട് ഷെയറാണ് കേരളത്തിന്റെ ഇടത് മനസ്. വിമോചനസമരം നടത്തി ജനകീയ സർക്കാരിനെ താഴെയിറക്കിയ ഇന്നാട്ടിൽ എൽ ഡി എഫിന് വോട്ട് ചെയ്യാതിരിക്കാൻ അവർക്ക് വിയോജിപ്പുള്ള ഒരു കാരണം കണ്ടാൽ മതി, യു ഡി എഫി ന് വോട്ട് ചെയ്യാൻ യോജിപ്പുള്ള ഒരു കാരണവും. ഈ കലാപങ്ങൾ ഓരൊരുത്തർക്കും ഓരൊ വിഭാഗത്തിനും ആ കാരണം നൽകും.
  12. UDF ബി ജെ പിയുടെയോ തിരിച്ചോ ചട്ടുകമാവുകയല്ല, പരസ്പരം ബാധ്യതപ്പെട്ടിരിക്കുന്ന കരാറിനെ, വലതുപക്ഷത്തിന്റെ പൊളിറ്റിക്കൽ പൊസിഷനെ പ്രാവർത്തികമാക്കുകയാണ് ഈ ചെയ്യുന്നത്. പി കെ ഫിറോസിന് കെ സുരേന്ദ്രന്റെ ശബ്ദമാവും, ബെന്നി ബെഹനാന് കുമ്മനത്തിന്റെ ശൈലി വരും, യു ഡി എഫ് സമരത്തിൽ രാഖിയും കാവിക്കൊടിയും കാണും,
    ചാനൽ ചർച്ചകളിൽ ഗോപാലകൃഷ്ണനും ചാമക്കാലയും പരസ്പരം വിവരങ്ങൾ വച്ച് മാറും, ചന്ദ്രിക യുവമോർച്ചക്കാർക്ക് അടികൊണ്ടതിൽ സങ്കടം പറയും,‌ ജന്മഭൂമി ജലീലിനെ മദനിയാക്കും, അത് ലീഗുകാർ നല്ല നേരം നോക്കി ഷെയർ ചെയ്യും, കുഞ്ഞാലിക്കുട്ടി ബി ജെ പിയല്ല മുഖ്യശത്രുവെന്ന് വിളിച്ച് പറയും.
  13. കലാപം നടത്തി പിടിക്കാൻ നോക്കി സംഘ് തോറ്റ തലശേരിയുടേയും കലാപം നടക്കാതെ തന്നെ രണ്ട് വിഭാഗമായി ചുരുങ്ങുന്ന മഞ്ചേശ്വരത്തേയും ഭൂരിപക്ഷ-ന്യൂനപക്ഷ ഡെമോഗ്രഫി ഏകദേശം കേരളത്തിന്റേതിന് സമാനമാണ്. തലശേരിയിൽ ഇനിയൊരിക്കലും പ്രതീക്ഷയില്ലാത്ത വിധം നാമ്പറ്റുപോയ സംഘിന് മഞ്ചേശ്വരവും കാസർഗോഡും നാളത്തെ പ്രതീക്ഷയാണ്. അവിടെ മൽസരം മതങ്ങൾ തമ്മിലാണ്.
    മതങ്ങൾ തമ്മിൽ മൽസരിക്കുന്ന മണ്ണാണ് വലതിന് വേണ്ടത്, മനുഷ്യരെക്കൊണ്ട് മതം പറയിപ്പിക്കുന്ന നിമിഷമാണവരുടെ വിന്നിംഗ് മൊമന്റ്. മുന്നേ പറഞ്ഞപോലെ, ഓരോ പക്ഷത്തിനും ഓരോ പ്രയോരിറ്റിയുണ്ട്. മതമൗലികവാദികൾ ജയിക്കാൻ ഏതറ്റം വരെയും പോകും, മറുപുറത്ത് തോൽക്കാതിരിക്കാൻ മനുഷ്യരും..!

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.